O‘zbekistonda “Temiryo‘l transporti to‘g‘risida”gi qonun yangi tahrirda ishlab chiqilib, muhokama uchun taqdim etildi.
Yangi tahrirdagi qonun loyihasi O‘zbkiston temir yo‘llari” AJ bilan birgalikda O‘zbekiston Respublikasi Transport vazirligi tomonidan tayyorlangan bo‘llib, 8 bob, 44 moddadan iborat. Bugungi kunda respublikada temiryo‘l transporti faoliyati asosan 1999-yil 15-apreldagi “Temiryo‘l transporti to‘g‘risida”gi qonuni (jami 28 ta modda) bilan tartibga solinadi.
Qonun loyihasining maqsadi temiryo‘l transporti sohasidagi iqtisodiy islohotlarni chuqurlashtirish, tadbirkorlik faoliyati uchun shart-sharoit yaratish, xorijiy investisiyalarni keng jalb etish, temiryo‘l transporti va xalqaro tashuvlar sohasida xalqaro hamkorlikni takomillashtirish, Qonunni amaldagi milliy va xalqaro qonunchilik hujjatlarining normalari talablariga muvofiqlashtirish, bo‘shliqlar va kamchiliklarni bartaraf etishdan iborat.
Qonun loyihasi tushuntirish xatida qayd etilishicha, amaldagi “Temiryo‘l transporti to‘g‘risida”gi qonunni moddama-modda o‘rganish natijalari undagi ko‘plab tushunchalarning ma’nosi hozirda eskirganini yoki qonunda o‘zining aksini topmaganini ko‘rsatmoqda.
Qonun loyihasida “Temiryo‘l transporti to‘g‘risida”gi qonunning tushunchalar qismiga qo‘shimchalar va o‘zgartirishlar kiritish, ya’ni “temiryo‘l transporti tashuvchisi”, “umumiy foydalanishda bo‘lmagan temiryo‘l transporti”, “temiryo‘l infratuzilmasi”, “umumiy foydalanishda bo‘lmagan temiryo‘llar” va boshqalar yangi tushunchalarni joriy etish va ochib berish ko‘zda tutilgan.
Shu munosabat bilan, qonun loyihasining alohida moddalarida ushbu tushunchalar va ularga qo‘yiladigan talablarning barchasi ko‘rsatilgan, bir-biriga nomuvofiq bo‘lgan va havolaki normalar qayta ko‘rib chiqilgan.
Xususan, “temiryo‘l transporti” tushunchasi qayta ko‘rib chiqildi va yangi tahrirda berildi, bunda respublikaning temiryo‘l transporti belgilangan maqsadlar bo‘yicha umumiy foydalanishdagi va umumiy foydalanishda bo‘lmagan temiryo‘l transportiga ajratildi.
Qonunning amaldagi 10-moddasini (temiryo‘l transportini boshqarish) yangi tahrirda bayon etish va uni alohida 11-14-moddalar bilan to‘ldirish va ularda har bir organning (Vazirlar Mahkamasi, davlat va xo‘jalik boshqaruvi organlari, mahalliy davlat hokimiyati organlari) vakolatlarini bayon etish taklif etilmoqda.
Shunday qilib, qonun loyihasini yangi tahrirda qabul qilish maqsadlari quyidagilardan iborat:
- temiryo‘l transportida tarkibiy islohotlarni yanada rivojlantirish va tartibga solish;
- temiryo‘l transportida raqobatni, ishlar va xizmatlarni rivojlantirish uchun shart-sharoit yaratish;
- temiryo‘l transporti sohasidagi normativ bazani texnik jihatdan tartibga solish to‘g‘risidagi qonunchilik hujjatlari va boshqa qonunlar qoidalariga muvofiqlashtirish;
- davlat va islohotlar natijasida tashkil etilgan mahalliy ijro etuvchi hokimiyat organlari, davlat va xo‘jalik boshqaruvi organlari, temiryo‘l transporti sohasidagi boshqa vakolatli organlar funksiyalariga aniqlik kiritish;
- temiryo‘l transportining investision jozibadorligini oshirish;
- temiryo‘l transportini va unda ko‘rsatiladigan xizmatlar sohasini qonunchilik hujjatlarida tartibga solishdagi bo‘shliqlarni bartaraf etish;
- yangi qonunlar va qonunosti hujjatlari qabul qilinishi munosabati bilan amaldagi “Temiryo‘l transporti to‘g‘risida”gi qonunda aks ettirilmagan temiryo‘l transporti sohasidagi qonunchilik normalarini takomillashtirish.
Ushbu qonun loyihasini tayyorlash jarayonida transportning turdosh tarmoqlariga (avtomobil, aviatsiya) doir milliy qonunchilik, qabul qilingan ko‘p tomonlama xalqaro shartnomalar, shu jumladan temiryo‘l transporti sohasida, MDH, Boltiqbo‘yi, Yevropa va Osiyo mamlakatlari qonunchiligi o‘rganilgan.
Qonun loyihasi muhokamasi 2024-yil 6-yanvargacha davom etadi.
Izoh (0)