Yevropa razvedka xizmatlaridan biri Rossiya 2024/25-yil qishida Yevropaga hujum qilishga urinishi mumkinligini bildirdi. Bu haqda Bild xabar berdi.
Xabarga ko‘ra, AQSH “o‘z yetakchisisiz” qolganida Rossiya Yevropaga zarba berishi mumkin, Vashington esa qisqa tanaffusdan keyingina yordamga keladi. Gap AQSHning amaldagi prezidentining 2024-yil noyabr oyi boshida lavozimini tark etishi va uning potensial vorisi tomonidan 2025-yil yanvarida lavozimga kirishishi o‘rtasidagi davr haqida ketmoqda.
Razvedka rasmiysining aytishicha, Rossiya rasmiylari sobiq prezident Donald Tramp Oq uyni qaytarib olishiga umid qilmoqda, chunki uning qo‘l ostida “hamma narsa bo‘lishi mumkin”. Avvalroq Germaniya mudofaa vaziri Boris Pistorius mamlakat mudofaasiga yaxshi tayyorlanishi kerakligini aytgandi.
“Qurolli kuchlarda ham, sanoatda ham, jamiyatda ham ilgarilashimiz uchun 5-8 yil vaqtimiz bor”, — degan u.
Bundan tashqari, Germaniya 2027-yilga qadar to‘rt ming Bundesver askarini Litvaga o‘tkazish niyatida ekanligi ma’lum bo‘ldi: Germaniya tarixida birinchi marta butun bir brigada NATOning sharqiy qanotida — Rossiya bilan chegarada doimiy ravishda joylashtiriladi. Pistorius, shuningdek, Germaniyada majburiy harbiy xizmatni tiklashga chaqirmoqda.
Izoh (0)