Alloh daraxt degan mo‘jiza yaratgan, yer yuzida karnaydan boshqa barcha soz daraxtdan bo‘ladi. Bu haqda O‘zbekiston xalq artisti Abduhoshim Ismoilov “Daryo” muxbiriga bergan qisqacha intervyusida aytib o‘tdi.
Toshkent viloyatining Bo‘stonliq tumanida “Yashil makon” umummilliy loyihasi doirasida Madaniyat vazirligi tizimidagi tashkilotlar, madaniyat xodimlari bilan birgalikda daraxt ekish tadbiri o‘tkazildi.
“Fortepiano, saksafon, klarnet, rubob, g‘ijjak, chang, pianino, royal: yog‘och aralashmagan birorta instrument topib bering, qoyil qolaman. Hattoki qo‘shnay, surnay ham daraxt.
Saksafonning kichkina qismi bor, unda ham daraxt. Puflaganda o‘sha yerdan ovoz chiqadi. Daraxtsiz soz yo‘q. Bitta karnayda daraxt yo‘q. Sababi karnayda ohang yo‘q, u faqat chaqiriqqa ishlaydi. Hattoki dirijyorning qo‘lida ham daraxt”, — dedi sozanda.
Abduhoshim Ismoilovning taʼkidlashicha, elektron skripka ishlab chiqilgan bo‘lsa-da, lekin unda dard yo‘q, shira yo‘q, nola yo‘q.
“Ming qochirim qiling, ming nola qiling, baribir daraxtning shirasini bermaydi. Shuning uchun daraxt bilan bog‘langan narsalar ilohiy.
Tut, o‘rik daraxtidan yaxshi instrumentlar chiqadi. Soz yasovchi ustalar 50-100 yoshli daraxtlarni fotiha o‘qib, Qurʼon tilovat qilib, keyin kesishganiga guvoh bo‘lganman”, — dedi xalq artisti.
Izoh (0)