Toshkent viloyati Angren shahrida inspektor haydovchiga nisbatan elektroshoker ishlatdi. Viloyat IIBB holat yuzasidan tushuntirish berdi.
Xabarga ko‘ra, voqea bugun, 18-dekabr soat 12:00 larda Toshkent viloyati, Angren shahri hududida sodir bo‘lgan. Shu kuni xizmatga jalb qilingan YPX inspektori tomonidan haydovchi 1988-yilda tug‘ilgan S.X. boshqaruvidagi Nexia-2 avtomashinasi qoida buzgani uchun to‘xtatilgan.
Inspektor tomonidan haydovchiga tushuntirish berilib, tegishli hujjatlarni taqdim etishi so‘ralganida, haydovchi hujjat berishdan bosh tortib, voqea joyidan ketib yuborgan. Shundan so‘ng shahar dehqon bozori hududida ikkinchi marta to‘xtatilgan fuqaro ogohlantirilib, qonuniy talabga bo‘ysunishi so‘ralganida, u YPX inspektorini turli so‘zlar bilan haqoratlab, qarshilik ko‘rsatishda davom etgan.
Natijada inspektor “Ichki ishlar organlari to‘g‘risida”gi qonunga asosan, elektroshoker qo‘llagan. Hozirda voqea ishtirokchilarining harakatlariga huquqiy baho berish maqsadida qo‘shimcha o‘rganish ishlari o‘tkazilmoqda.
Izoh (0)