Fransiya prezidenti Emmanuel Makron, agar Rossiya prezidentida Ukrainada tinchlik o‘rnatish bo‘yicha “jiddiy takliflar” bo‘lsa, Vladimir Putinning qo‘ng‘irog‘ga javob berishini aytdi. Bu haqda u Yevropa Ittifoqi yetakchilarining Bryusseldagi sammiti yakunlari bo‘yicha o‘tkazilgan matbuot anjumanida aytdi.
“(Telefon) raqamimni o‘zgartirmaganman”, — dedi Makron.
U Rossiya prezidentining Makron u bilan aloqani to‘xtatgani haqidagi so‘zlariga shunday izoh berdi. Fransiya rahbarining ta’kidlashicha, “kelishuvlarni buzib” urush boshlagan u emas, “Ukrainada urush jinoyatlarini sodir etib, muloqotni imkonsiz qilgan davlat Fransiya emas”.
“Agar prezident Putinda dialog va oldinga siljish, mojarodan chiqish va barqaror tinchlik o‘rnatish, yaʼni xalqaro huquq va demak, Ukraina manfaatlari va suverenitetini hurmat qilish bo‘yicha jiddiy takliflar bo‘lsa, men qo‘ng‘iroqni qabul qilaman”, — dedi Fransiya prezidenti.
14-dekabr kuni jonli efirdagi chiqishi chog‘ida Rossiya prezidenti Vladimir Putin Makron bilan muloqotga tayyor ekanini, biroq Fransiya bilan aloqalar mamlakat prezidenti tashabbusi bilan to‘xtatilganini aytdi. Putinning so‘zlariga ko‘ra, u “muloqotdan qochmaydi”, ammo Makron istamasa, “hech qanday jarayoni bo‘lmaydi”.
“Munosabatlar yaxshi edi. Hammaga ma’lum, men Fransiyada bo‘lganman, janob Makron Rossiyaga kelgan. Lekin bir muncha vaqt Fransiya prezidenti biz bilan munosabatlarni to‘xtatdi. Biz to‘xtamadik, men to‘xtamadim. To‘xtatgan u. Agar istak bo‘lsa, marhamat, biz tayyormiz”, — dedi Putin.
Makron Ukrainadagi urushdan oldin ham, u boshlanganidan keyin ham Vladimir Putin bilan muzokaralar olib borishga uringan asosiy jahon yetakchilaridan biri sanaladi.
Izoh (0)