Xitoylik olimlar aholi, ayniqsa, bolalar orasida keng tarqalayotgan xavfli pnevmoniyaning taxminiy sababini topdi. Tadqiqotlar shuni ko‘rsatdiki, kasallik superbakteriyalar tomonidan qo‘zg‘atilgan, deb yozadi DailyMail.
Taxminan uch hafta oldin, noyabr oxirida, Xitoyning shimoliy hududlarida noma’lum pnevmoniyaning ommaviy epidemiyasi kuzatilgandi. Bolalar orasida mikoplazma pnevmoniyasi bilan kasallanganlar sonini kamaytirish uchun maktablar yopildi.
Olimlarning uzoq muddatli izlanishlari natijasida ommaviy infeksiyaga antibiotiklarning aksariyat turlariga chidamli superbakteriyalar sabab bo‘lgan, degan xulosaga kelindi.
“Tibbiy ma’lumotlar shuni ko‘rsatadiki, bu bakteriya keltirib chiqaradigan infeksiyalarning 90 foizi hozirda Xitoyda oddiy antibiotiklarga chidamli. Antibiotiklar bakterial infeksiyalarni davolashda qo‘llanganda, ayrim bakteriyalar mutatsiyaga uchrashi yoki dorilarga chidamli genlarni olishi mumkin”, — deb yozadi nashr.
Mikoplazma pnevmoniyasi odatda azitromitsin antibiotiklari bilan davolanadi. Ammo preparatni haddan tashqari ko‘p qabul qilish bakterial populyatsiyada qarshilikni keltirib chiqardi va davolash samarasiz kechadi.
Xitoyda epidemiyaga “oq o‘pka” deb nom berishdi, chunki pnevmoniya bilan og‘rigan bolalarning o‘pkasi rentgenogrammalarida oq dog‘lar ko‘rinadi. Shifokorlarning ta’kidlashicha, bu o‘pka to‘qimalarining zich joylashgan nuqtalari hisoblanadi, bu nuqtalar organizmning mikoplazma pnevmoniyasi kabi kasalliklarga qarshi kurashi oqibatida yuzaga kelgan bo‘lishi mumkin.
Izoh (0)