Venesuela va Gayana prezidentlari bahsli hudud ustida urushmaslikka kelishib oldi

Venesuela va Gayana yetakchilari Essekibo mintaqasi bo‘yicha hududiy bahsda mamlakatlar bir-biriga qarshi kuch ishlatmasligini ma’lum qildi.

Venesuela prezidenti Nikolas Maduro va Gayana prezidenti Irfaan Ali 14-dekabr kuni Sent-Vinsent va Grenadin davlati poytaxti Kingstaun shahrida bo‘lib o‘tgan sammitdan so‘ng qo‘shma bayonot berdi.

Ikkala davlat ham “hech qanday sharoitda bir-biriga tahdid qilmaslik yoki kuch ishlatmaslik”, shuningdek, “mojaroni avj oldirishdan tiyilish”ga kelishib oldi, deb yozadi CNN.

Maduro va Ali Essekibo muammosi bo‘yicha o‘zaro hamkorlik qilish uchun tashqi ishlar vazirlari darajasida komissiya tuzishga kelishib oldi — Venesuela va Gayana vakillari o‘rtasida navbatdagi uchrashuv yaqin uch oy ichida Braziliyada bo‘lib o‘tadi.

Shu bilan birga, CNN ta’kidlaganidek, Venesuela va Gayananing Essekibo mintaqasi bo‘yicha pozitsiyalari farqliligicha qolmoqda. Gayana hududiy mojaro Xalqaro Sud tomonidan hal qilinishi kerak, deb hisoblaydi, Venesuela esa uning bu bahsdagi yurisdiksiyasini tan olmaydi.

Eslatib o‘tamiz, dekabr oyi boshida Venesuelada referendum bo‘lib o‘tdi, unda xalq neftga boy Essekibo hududini anneksiya qilish uchun ovoz berdi. Maduro bir qator tegishli farmonlarni imzoladi. Gayana hukumati esa ittifoqchilar va mintaqaviy sheriklarga harbiy yordam so‘rab murojaat qildi.