Navoiy viloyati maktabgacha va maktab taʼlimi boshqarmasi Navoiy shahridagi 6-maktab o‘quvchilarining dars mashg‘ulotlariga sport oyoq kiyimi kiyib kelishi bilan bog‘liq ijtimoiy tarmoqlarda tarqalgan xabarlarga rasmiy munosabat bildirdi.
Ijtimoiy tarmoqlarda tarqalgan videoda o‘qituvchi ota-onalarga murojaat qilib, o‘quvchilar maktabga krossovkada kelishi mumkin emasligini aytgan. “Hozir biror tekshirish kelib qolsa nima bo‘ladi? Jismoniy tarbiya bo‘ladigan bo‘lsa, sumkasiga formasi bilan paketchaga solib, olib kelish kerak edi. Tasavvur qiling — mening joyimda siz o‘tiribsiz, nima qilgan bo‘lardingiz?” — deydi o‘qituvchi videoda.
Boshqarmaning ma’lum qilishicha, “Umumiy o‘rta taʼlim muassasasining takomillashtirilgan namunaviy odob-axloq qoidalari”da o‘quvchilarga maktab hududida va dars jarayonlari davomida qo‘yiladigan talablar ko‘rsatib o‘tilgan. Unda o‘quvchilar taʼlim muassasasiga maktab ustavida belgilangan o‘quvchilar libosida kelishi kerakligi ko‘rsatilgan.
“Taʼlim muassasasiga krossovkada kelmasligi kerak degan talab mavjud emas”, — deyiladi munosabatda.
Shuningdek, Navoiy viloyatidagi maktablarda o‘quvchilar kiyimini tartibga solish bo‘yicha tekshiruv ishlari olib borilishi belgilanmagan. 6-maktab maʼmuriyati va o‘qituvchilari ishtirokida bu borada zarur tushuntirish ishlari olib borilgan.
Eslatib o‘tamiz, 2022-yil sentyabrda Toshkent shahar Mirzo Ulug‘bek tumanida joylashgan 142-sonli maktabda ichki ishlar organlari xodimlari, maktab ma’muriyati hamda o‘quvchilar o‘rtasida o‘tkazilayotgan profilaktik suhbat jarayoni aks etgan video va fotosurat tarqalib, keng muhokamalarga sabab bo‘lgandi.
Izoh (0)