Oliy Majlis Qonunchilik palatasi 12-dekabr kuni bo‘lib o‘tgan majlisida dronlardan noqonuniy foydalanganlik va uni mamlakatga olib kirish uchun javobgarlikni yengillashtiruvchi o‘zgartirish ko‘zda tutilgan qonun loyihasi ikkinchi va uchinchi o‘qishda muhokama qilindi. Bu haqda quyi palata matbuot xizmati xabar berdi.
Bugungi kunda amaldagi qonunchilikka binoan uchuvchisiz uchish apparatlarini noqonuniy olib kirish, sotish, sotib olish, saqlash yoki foydalanish uchun faqat jinoiy javobgarlik nazarda tutilgan (Jinoyat kodeksining 244−4-moddasi 1-qismi bilan — 3 yilgacha ozodlikdan mahrum qilish, og‘irlashtiruvchi holatlarda — 10 yilgacha).
Taklif etilayotgan qonun loyihasida respublika hududida uchuvchisiz uchadigan apparatlardan noqonuniy foydalanishni birinchi marta sodir etgan shaxslarga nisbatan jinoiy javobgarlik o‘rniga ma’muriy javobgarlik belgilanmoqda. Bu kabi huquqbuzarliklarni takror sodir etganlik uchun jinoiy javobgarlik jazo choralarini yengillashtirish nazarda tutilyapti.
Buning uchun bazaviy hisoblash miqdorining 10−20 baravari miqdorida jarima belgilash taklif etildi. Bundan tashqari, sud qarori bilan qurilma davlat foydasiga musodara qilinadi. Maʼmuriy javobgarlik to‘g‘risidagi kodeksning yangi 185-4-moddasiga ko‘ra, huquqbuzar qurilmani ixtiyoriy ravishda topshirsa, u javobgarlikdan ozod qilinadi.
Jinoyat kodeksining amaldagi sanksiyalariga jazoning muqobil turlari — jarima, axloq tuzatish ishlari, ozodlikni cheklash turlarini kiritish taklif etilmoqda.
Kiritilayotgan normalar fuqarolarning huquqlari va qonuniy manfaatlarini ishonchli himoya qilish, mamlakatga chet ellik turistlarning keng jalb etilishi uchun qulay sharoitlarni ta’minlash, shuningdek, respublikaning xalqaro maydondagi nufuzini mustahkamlashga xizmat qiladi, — deyiladi xabarda.
Majlisda qonun loyihasi deputatlar tomonidan qabul qilindi.
Eslatib o‘tamiz, prezident Shavkat Mirziyoyev 2019-yilning 2-may kuni dronlardan noqonuniy foydalanganlarni ozodlikdan mahrum etishni ko‘zda tutuvchi qonunni imzolagan edi. Qonunga ko‘ra, Jinoyat kodeksiga uchuvchisiz uchadigan apparatlarni qonunga xilof ravishda olib kirish, o‘tkazish, olish, saqlash yoki ulardan foydalanish uchun uch yilgacha ozodlikdan mahrum qilish jazosi kiritilgan.
Izoh (0)