AQSH prezidenti Jo Bayden Ukraina prezidenti Vladimir Zelenskiyga 12-dekabr kuni Oq uyda uchrashuv o‘tkazish haqida taklifnoma yubordi. Ukraina rahbarining ofisi AQSHga tashrif 11-dekabrda boshlanishini ma’lum qildi. Bundan tashqari, Zelenskiy AQSH Kongressi Vakillar palatasi spikeri, respublikachi Mayk Jonson bilan uchrashishni rejalashtirmoqda.
.avif)
Oq uy matbuot kotibi Karine Jan-Pyerning aytishicha, Amerika prezidenti ukrainalik hamkasbiga “AQSHning Ukraina xalqini Rossiya bilan mojaroda qo‘llab-quvvatlashga sodiqligini ta’kidlash uchun” taklif qilgan.
“Rossiya Ukrainaga qarshi raketa va dron hujumlarini kuchaytirar ekan, yetakchilar Ukrainaning favqulodda ehtiyojlarini, hozirgi o‘ta og‘ir pallada AQSH qo‘llab-quvvatlovining davom etishi muhim ahamiyatga ega ekanini muhokama qiladi”, — dedi Jan-Pyer xonim bayonotida.
O‘z navbatida, Ukraina prezidenti ofisi Zelenskiy Qo‘shma Shtatlardagi uchrashuvlar chog‘ida “Ukrainani qo‘llab-quvvatlashda AQSH, Yevropa va dunyoning birligini ta’minlash”, shuningdek, “qoidalarga asoslangan xalqaro tartibni mustahkamlash va mamlakatlar suverenitetini hurmat qilish” masalalariga e’tibor qaratishini aytdi.
“Vashingtonda muhokama qilinadigan asosiy mavzular — Ukraina va AQSH o‘rtasidagi mudofaa sohasidagi hamkorlik, xususan, qurol-yarog‘ va havo hujumiga qarshi mudofaa tizimlarini ishlab chiqarish bo‘yicha qo‘shma loyihalar, shuningdek, kelasi yilda mamlakatlar o‘rtasidagi saʼy-harakatlarni muvofiqlashtirish bo‘ladi”, — deyiladi ofis xabarida.
Mayk Jonsonning vakili Vakillar palatasi spikeri va Vladimir Zelenskiy o‘rtasidagi uchrashuv Kapitoliyda bo‘lib o‘tishini aytdi, deb yozadi AFP. Respublikachilar nazoratidagi Quyi palata oktyabr oyidan beri Ukrainaga yordam masalasida kelisha olmayapti. Jonson Oq uyning Ukraina, Isroil va Tayvanga yordam ko‘rsatish hamda AQSH janubiy chegarasini mustahkamlashni nazarda tutuvchi qonun loyihasiga qarshi chiqmoqda.
Ayni paytda Vladimir Zelenskiy Argentinada bo‘lib turibdi. 10-dekabr kuni u Buenos-Ayresda prezident Xaver Maylining inauguratsiyasida ishtirok etdi.
Izoh (0)