Sirdaryo viloyati hokimining birinchi o‘rinbosari Rahimjon Boboyevning aytishicha, viloyatning Xovos tumanida Malibu avtomobili bor fuqaroga yordam puli berib kelinayotgani ma’lum bo‘lgan. Bu haqda “Daryo”ga viloyat hokimligi axborot xizmati xabar berdi.
Rasmiylarga ko‘ra, hokim o‘rinbosari bu haqda Xovos tumani aholisi bilan muloqotida gapirgan.
Prezidentimiz kechagi yig‘ilishda to‘g‘ri aytdi, ko‘p odamlar boqimandalikka o‘rganib qoldi. Bitta misol keltiraman. Kecha kam ta’minlanganlik bo‘yicha, yosh bo‘yicha har xil nafaqa oluvchilarni, yordam puli oluvchilarni sarhisob qilganimizda nafaqa oluvchilarning 109 nafarida shaxsiy avtomobil borligi ma’lum bo‘ldi. Xovos tumanida Malibu avtomobili bor odam nafaqa olar ekan. Uyida Malibu’si bor, lekin yolg‘on hujjatlar qilib, davlatdan har oy nafaqa pulini olyapti. Uyalmaydi. Xudodan ham qo‘rqmaydi, — deydi Rahimjon Boboyev.
Mas’ulning qo‘shimcha qilishicha, u ilgari murojaatchi fuqaroning roziligini olish uchun murojaatchiga ikkita uchastka bergan.
Bo‘ldi, men roziman deb ketgan edi. Lekin men ketganimdan so‘ng, yana murojaat qilib kelib, davlatdan yana 3-4 million pul undiribdi. Lekin men unga ikkita uchastka berganman, bugungi kunda uning har biri 48-50 million so‘m deyilyapti. Ikkitasi 100 million bo‘ladi. Mana noinsoflik. Prezidentimiz to‘g‘ri aytyapti, boqimandalar ko‘p. Ular bizni aldayapti. Birovning haqini birov yeyapti, — deydi viloyat hokimi o‘rinbosari.
Avvalroq Qashqadaryo viloyati hokimi Murodjon Azimov murojaatchi fuqarolardan birining xonadoniga borib, mehnatga layoqatli, zabardast yigitning ishlamay, “davlatning qo‘liga qarab yotganiga” guvoh bo‘lganini, uning uyiga haqiqiy muhtoj degan ma’noda bozor-o‘char qilib borganidan uyalib ketganini ma’lum qilgandi.
Izoh (0)