Ko‘zga infeksiya tushishi, quruqlik sindromi, yelimning asoratlari — ko‘z shifokori ulama kiprikning salbiy jihatlari haqida tushuntirish berdi

Hozirgi kunda ulama kipriklar urfga kirib, undan foydalanish ortib bormoqda. “Ko‘z nuri” klinikasi bosh shifokori Hikmatullo Sodiqov “Daryo” nashriga bergan qisqacha intervyusida ulama kipriklarning ko‘zga taʼsiri haqida tushuntirish berdi.

Shifokorning aytishicha, ulama kipriklar kosmetik jihatdan ayol-qizlarimizni go‘zal ko‘rsatishi mumkin, lekin buni o‘ziga yarasha salbiy jihatlari ham bor.

Kiprik qirg‘oqlariga ulama kiprikni yopishtirish hisobiga ko‘zga infeksiya tushishi ehtimoli bor. Shuningdek, ko‘zda quruqlik sindiromi rivojlanish xavfini oshiradi.

Baʼzi holatlarda kiprikni qotirish uchun surilgan yelim qovoq terisi va ko‘z ichiga tushishi mumkin. Bu ko‘zda turli asoratlar keltirib chiqaradi, — deydi shifokor.

Yagona xavf – tabiiy kipriklarning to‘kilib ketishidir. Bunday holda ulama kiprikdan voz kechib, qayta tiklovchi muolajalardan foydalanish kerak. 99 foiz holatlarda kipriklar qayta o‘sib chiqadi. Faqat buning uchun uzoq vaqt kutishga to‘g‘ri keladi.