Farg‘ona va Navoiy viloyatlarida kelin sepini kuyov va uning qarindoshlari qaytib bermagani uchun MIB tomonidan majburiy taritibda olib berilgani haqida xabar berilgan edi. “Daryo” nashri mazkur holatlarda kelinga nima uchun va qanday sabablar bilan sepi qaytarilmaganini o‘rgandi.
Eslatib o‘tamiz, qonunchilikda vindikatsion daʼvo degan tushuncha bor (Fuqarolik kodeksi 228-modda). Unga ko‘ra, mulkdor o‘z mol-mulkini boshqa shaxsning qonunsiz egaligidan talab qilib olishga haqli hisoblanadi.
Birinchi holat — Farg‘ona
Farg‘ona viloyatida joriy yil avgustda qurilgan nikoh hech qancha o‘tmay kelishmovchilik sababli buziladi va kelin-kuyov boshqa-boshqa yashaydi. Kelin kuyovdan sepini qaytarishni talab qilib, sudga murojaat qilgan va MIB orqali eridan 34 turdagi 11 million so‘mlik mulklarini qaytarib olgan.
Mazkur holat bilan shug‘ullangan inspektorlar bergan maʼlumotga ko‘ra, kelin-kuyov to‘ydan keyin 15 kun birga yashagan.
To‘ydan avval kelin tomon kuyovga qilgan kostyum-shim yoqmagani uchun ham kichik janjal bo‘lgan. To‘y kuni kelin kuyovni qo‘lini bir marta tutmagani uchun ham o‘rtada kelishmovchilik chiqqan.
To‘ydan keyin kuyov kelinni ishidan kamchiliklar topib, janjal chiqarib turgan. Bot-bot kelinga ko‘ngli bo‘lmaganini aytib kelgan. To‘ydan 15 kun o‘tib, kelin onasini ko‘rib kelish uchun ota uyiga ketgan va shu bo‘yi qaytib kelmagan.
Kuyovning ota-onasi kelin tomon bilan gaplashganida kelin kuyov bilan boshqa yashamasligini aytgan. Yarashtirish ish bermagach, kelin tomon sepni olib kelishga borganda kuyov tomon qaytarmagan.
Kuyovning ota-onasi kelin hech bir sababsiz uyga ketib qolgani, to‘y uchun 10 ming dollar pul sarflab qo‘yganini va kelin tomon uni qoplab berishi kerakligini aytgan, — deydi MIB inspektori.
Ikkinchi voqea — Navoiy
Navoiy viloyati Karmana tumanida eri bilan ajrashgan kelin sobiq turmush o‘rtog‘ining uyidan o‘ziga tegishli mulkni olib ketmoqchi bo‘lganida unga qarshilik ko‘rsatilgan. Mulkini turmush o‘rtog‘ining uyidan olib berish uchun sudga murojaat qilib, MIB orqali 27 turdagi mol-mulklarini qaytarib olgan.
Mazkur ish bilan shug‘ullangan MIB inspektorining aytishicha, er-xotin ikki yildan ortiq birga yashagan. Oila buzilishiga erning ichkilikka ruju qo‘ygani sabab bo‘lgan.
Kuyov tomonidan nima uchun kelin sepini bermagani so‘ralganida, “Sepni bermasam, xotinim qaytib kelib men bilan birga yashaydi deb o‘ylagandim”, deya javob bergan.
MIB inspektorlaring “Daryo”ga maʼlum qilishicha, yuqorida keltirilgan misollar amaliyotda tez-tez uchrab turadi. Kelin o‘z sepini olish uchun sudga murojaat qilish holatlari ko‘paygan.
Izoh (0)