Fransiyaning ba’zi shaharlarida taksi haydovchilari hukumatning bir vaqtning o‘zida shifokor oldiga ketayotgan bir nechta bemorlarni tashish haqidagi yangi talabiga qarshi namoyishlar uyushtirmoqda. Bu haqda RMC radiosi xabar berdi.
Ma’lumotlarga ko‘ra, haydovchilar Marsel, Tuluza, Lill, Bayonna, Lion, Bordo va boshqa shaharlardagi shaharlararo avtomagistrallarda yo‘llarni to‘sib, harakatga xalal berishni rejalashtirmoqda.
Marselda norozilik bildirgan 700 nafar haydovchi aksiyaga qo‘shilib, prefektura va mahalliy ijtimoiy sug‘urta idorasi yo‘nalishida kichik tezlikda harakatlanishdi.
E’tirozga sabab “Ijtimoiy budjetni moliyalashtirish to‘g‘risida”gi yangi qonunning 30-moddasi bo‘lib, unga ko‘ra, shifokorga taksi yo‘lkira narxining bir qismini sug‘urta orqali qoplamoqchi bo‘lgan bemorlar shaxsiy internet platformalari orqali avtomashina bron qilishlari kerak bo‘ladi. Ular o‘zlariga qulay bo‘lgan taksoparkni tanlab, shifokor oldiga ketayogan boshqa bemorlar bilan birgalikda yetib olishga rozilikni anglatuvchi tugmani bosishlari kerak bo‘ladi.
Bunday holda, agar bemor boshqa bemor bilan bir mashinada ketishdan bosh tortsa, unga yo‘l haqining kamroq qismi qoplab beriladi (agar narigi bemorda yuqumli kasallikka chalinganini bildiruvchi shifokorning tegishli xulosasi bo‘lsa, birinchi bemor u bilan bir mashinada ketishni rad etishi mumkin).
Hozirda davlat sug‘urtasi shifokorga taksida borishning 55 foizini qoplaydi.
Ushbu choraning maqsadi, qonun loyihasidan kelib chiqqan holda, “bir necha bemorlarni bitta mashinada shifokor oldiga borishini rag‘batlantirish” orqali budjet xarajatlarini kamaytirishdir.
Hukumat ma’lumotlariga ko‘ra, 2022-yilda bir necha bemorlarni bitta avtomashinalarda tashish transport xarajatlarini 34 million yevroga tejagan. Biroq, bunday holatlar umumiy miqdorning atigi 15 foizini tashkil etdi, shuning uchun rasmiylar bu amaliyotni kengaytirishga harakat qilmoqda.
Izoh (0)