“Farg‘ona” bojxona posti boshlig‘i lavozimida xizmat qilgan sobiq bojxona xodimi A.Ashurov sud hukmi bilan oqlandi. Bu haqda Oliy sud axborot xizmati xabar berdi.
Ma’lumot berilishicha, 2005-yilda u Jinoyat kodeksining 205-moddasi 2-qismi “a”, “v” bandlari (hokimiyat yoki mansab vakolatini suiisteʼmol qilish), 208-moddasi (hokimiyat harakatsizligi), 209-moddasi 1-qismi va 209-moddasi 2-qismi “a” bandi (mansab soxtakorligi takroran yoki xavfli retsidivist tomonidan) bilan aybdor deb topilib, prezidentning 2004-yil 1-dekabrdagi “O‘zbekiston Respublikasi Konstitutsiyasi qabul qilinganligining o‘n ikki yilligi munosabati bilan amnistiya to‘g‘risida”gi farmoniga muvofiq jazodan ozod qilingan edi.
Oliy sudning jinoyat ishlari bo‘yicha sudlov hayʼati kassatsiya instansiyasining 2023-yil 25-apreldagi ajrimi asosida jinoyat ishlari bo‘yicha Farg‘ona viloyati sudi tomonidan 2005-yil 4-aprelda qabul qilingan apellyatsiya ajrimining A. Ashurovga oid qismi bekor qilinib, jinoyat ishining shu qismi yangidan apellyatsiya instansiyasida ko‘rish uchun yuborildi. Sud Quvasoy shahar sudining 2005-yil 28-fevraldagi hukmini bekor qilib, A.Ashurovni aybsiz deb topdi va oqladi.
Davlat bojxona qo‘mitasining 2023-yil 8-noyabrdagi buyrug‘iga binoan, bojxona xizmati mayori A.Ashurov bojxona organlari tizimiga ishga tiklandi. O‘tgan 18 yil muddat ham uning umumiy mehnat stajiga qo‘shiladigan bo‘ldi.
Izoh (0)