Surxondaryo viloyati hokimi Ulug‘bek Qosimovning internetda tarqalgan har bir murojaatga shaxsan e’tibor qaratishi surxondaryoliklarning respublikaga qilayotgan murojaatlarining keskin kamayishiga olib kelgani ma’lum bo‘ldi. Bu haqda “Daryo”ga viloyat hokimining matbuot kotibi Murodbek Davlatov gapirib berdi.
Ijtimoiy tarmoqlarda viloyat hokimining shaxsan o‘zi bosh-qosh bo‘layotgan guruhlarimiz bor. Mazkur guruhda jurnalistlar, blogerlar, jamoatchilik vakillari va rahbarlar birlashgan. Viloyat hayotiga oid har bir muammo xoh u jurnalist tomonidan ko‘tarilgan bo‘lsin, xoh bloger, xoh jamoatchilik vakili bo‘lsin, shaxsan viloyat hokimining e’tiboriga havola qilinadi. Va shaxsan viloyat rahbari tomonidan nazoratga olinib, rahbarlarga yechimi bo‘yicha topshiriq beriladi, — deydi Murodbek Davlatov.
Mas’ulning aytishicha, jurnalist va blogerlar tomonidan mazkur guruhga tashlangan har bir masala nafaqat nazoratga olinadi. Uning yechimi bo‘yicha rahbarlarning alohida hisoboti ham tinglanadi.
Har dushanba kuni odatda ijro intizomi bo‘yicha muhokama yig‘ilishi o‘tkaziladi. Mazkur yig‘ilish Zoom tarzida bo‘lib, unda murojaatchilar ham ishtirok etadi. Rahbar muammoga qanday yechim topganini nafaqat viloyat rahbariga, murojaatchilarga, jurnalist-blogerlarga aytib, hisobot beradi, — deydi Surxondaryo hokimining matbuot kotibi.
Surxondaryo viloyati hokimligi qabulxona mudiri Bahodir Doniyorovning qo‘shimcha qilishicha, har bir murojaatga shu tarzda yondashish surxondaryoliklarning respublikaga qilayotgan shikoyatlarining 26 mingtaga kamayishiga olib kelgan.
Viloyatimiz aholining respublika tashkilotlariga murojaatlari soni bo‘yicha O‘zbekistonda ikkinchi o‘rinda turar edi. Muammolarga shaxsan viloyat hokimining e’tibor qaratishi, rahbarlarning mas’uliyatni his etishi va shu tarzda ishlashi 2023-yilning o‘n oylik hisob-kitoblarida respublika qilingan murojaatlar 2022-yilga nisbatan 26 mingtaga kamayganini ko‘rsatdi, — deydi Bahodir Doniyorov.
Avvalroq Ulug‘bek Qosimov muammolarni ko‘tarib chiqib, hokimlikka yaqindan yordam berayotgan jurnalist va blogerlarga minnatdorlik izhor qilgandi.
Izoh (0)