Sirdaryoda Qishloq xo‘jaligi xodimlari kuni munosabati bilan 19 nafar ilg‘or fermerga sayohat uchun Misrga yo‘llanma berildi

Sirdaryo viloyatida faoliyat yurituvchi eng ilg‘or fermerlarga sayohat uchun Misrga yo‘llanma berildi. Bu haqda “Daryo”ga viloyat hokimligi axborot xizmati rahbari Zafar Mirrahimov xabar berdi.

Ta’kidlanishicha, bu haqda bugun “Zomin” tantanalar majmuasida bo‘lib o‘tgan O‘zbekiston qishloq xo‘jaligi xodimlari kuni — “Hosil bayrami”da ma’lum qilingan. 

Tadbirda so‘z olgan viloyat hokimi Akmaljon Mahmudaliyev soha xodimlarini bugungi kasb bayrami bilan samimiy muborakbod etdi va bu yilgi erishilgan natijalar, oldinda turgan dolzarb vazifalar xususida to‘xtaldi. Joriy yil viloyatimizda yetishtirilgan qishloq xo‘jaligi mahsulotlaridan jami 11 trillion 218 milliard so‘m yoki o‘tgan yilga nisbatan 1 trillion 936 milliard so‘m ko‘p foyda olindi. 

Mirishkor dehqon va fermerlar, suvchi va irrigatorlar, mexanizator va agronomlarning zahmatli mehnati, ilmiy yondashuvlari bilan 563 ming tonna g‘alla, 712 tonna pilla, 505 ming tonna meva-sabzavot, 331 ming tonna go‘sht va sut mahsulotlari, 136 mln dona tuxum yetishtirildi. Ayniqsa, paxtachilikda erishilgan yutuqlar salmoqli bo‘ldi deyish mumkin. Paxtachilik klasterlari va fermerlar tomonidan 300 ming tonna yoki shartnomaviy rejaga nisbatan 111,2 foiz paxta xom ashyosi yetishtirildi. O‘tgan yilga solishtirganda o‘rtacha hosildorlik 4,2 sentnerga oshdi, — deydi hokimlik axborot xizmati rahbari Zafar Mirrahimov.

Aniqlashtirilishicha, viloyatda investitsiya dasturlari doirasida qishloq xo‘jaligi sohasini rivojlantirish bo‘yicha 374 milliard so‘mlik mablag‘lar hisobiga 188 ta loyihalar amalga oshirilib, 2000 dan ziyod yangi ish o‘rinlari yaratilgan.

Bularning tag zamirida oziq-ovqat xavfsizligini ta’minlash bilan birga, xalqimiz dasturxonini farovon qilishdek olijanob maqsad yotganligini bildirgan viloyat rahbari, kelgusi yilda ham ishlarni shunday qat’iyat, birdamlik bilan davom ettirishga tilak bildirdi. Tadbirda soha rivojiga salmoqli hissa qo‘shgan davlat va jamoat tashkilotlari vakillari hamda qishloq xo‘jaligi xodimlari “O‘zbekiston Respublikasi qishloq xo‘jaligi fidoyisi”, “O‘zbekiston Respublikasi suv xo‘jaligi a’lochisi”, “Namunali tomorqachi” ko‘krak nishoni, “Sirdaryo viloyatining 60 yilligi” esdalik nishoni, tashakkurnoma va qimmatbaho sovg‘alar bilan mukofotlandi. Shuningdek, eng ilg‘or 19 nafar fermerga Misr davlatiga sayohatga borish yo‘llanmasi taqdim etildi, — deydi viloyat hokimining matbuot kotibi.