“Granada” va “Atletik” o‘rtasidagi bahs tribunadagi muxlisning ahvoli yomonlashgani tufayli to‘xtatildi

Ispaniya La Ligasi doirasidagi o‘yin tribunadagi muxlisning yurak xuruji tufayli to‘xtatildi.

16-turdan o‘rin olgan “Granada” va “Atletik” o‘rtasidagi bahs 17-daqiqada to‘xtatildi. Tribunada o‘yinni tomosha qilayotgan muxlisga nafas yetishmay qolgan va yurak xurujiga uchragan. “Atletik” darvozaboni Uani Simon vaziyatni payqadi va o‘yinni to‘xtatishni so‘radi. Shundan so‘ng ikkala jamoa shifokorlari jabrlanuvchiga yordam berish uchun tribunaga yugurdi.

Bosh hakam Migel Anxel Ortis Aryas jamoalarni kiyim almashtirish xonasiga olib ketdi. Qayd etilishicha, jarohatlangan muxlisning ahvoli og‘ir bo‘lgan va uni shifoxonaga olib ketishga muvaffaq bo‘lgan. O‘yin esa davom ettirilmadi.

Keyinchalik, “Atletik” klubining xabar berishicha, tomoshabin vafot etgan.