“Farg‘ona” aeroportida noqulay ob-havo sharoiti tufayli “Azimut” aviakompaniyasining Moskva—Farg‘ona reysi Namangandagi muqobil aerodromga yo‘l oldi. Bu haqda Uzbekistan Airports matbuot xizmati xabar berdi.
Ma’lum qilinishicha, bortida 100 nafar yo‘lovchi bo‘lgan samolyot mahalliy vaqt bilan soat 06:09 da Namanganga kelib qo‘ngan. A9170 Farg‘ona—Moskva reysi yo‘lovchilari yerusti transportida Namangan aeroportiga yetkazilgan.
8-dekabr kuni quyuq tuman sababli O‘zbekistondagi ayrim aeroportlar faoliyati cheklangani to‘g‘risida xabar berilgandi. Xususan, Irkutsk—Farg‘ona yo‘nalishi bo‘yicha reysni amalga oshirayotgan S7 Airlines samolyoti noqulay ob-havo sharoiti tufayli Namangan aeroportidagi muqobil aerodromga qo‘ngan. Keyinroq O‘zbekiston xalqaro aeroportlarida qoldirilgan parvozlar bo‘yicha ma’lumot berilgan edi.
Izoh (0)