Davlat xavfsizlik xizmati xodimlari tomonidan o‘tkazilgan tezkor tadbirda Toshkent shahrining Sergeli tumanida joylashgan choyxonada qimor o‘ynayotgan bir guruh shaxslar qo‘lga olindi, deb xabar beradi O‘zA.
Qayd etilishicha, choyxonani ko‘zdan kechirish jarayonida qimor o‘yinlarida foydalaniladigan oshiq suyaklar, o‘yin kartalari, plastik chashkalar, sochilgan holda yotgan 1,8 ming dollar va 755 ming so‘m ashyoviy dalil sifatida rasmiylashtirib olingan.
Tadbir davomida qimor o‘yini tashkilotchisi, Chilonzor tumanida yashovchi shaxs qo‘lga olinib, u doimiy tarzda bu kabi o‘yinlarni tashkil qilib kelgani maʼlum bo‘lgan.
Holat yuzasidan bu fuqaroga nisbatan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilib, tergov harakatlari olib borilgan.
2023-yilning oktyabr oyida jinoyat ishlari bo‘yicha Sergeli tuman sudi tomonidan mazkur fuqaroga 4 yil-u 11 oy muddatga ozodlikdan mahrum qilish jazosi tayinlangan.
Oktyabr oxirlarida Farg‘ona viloyati Uchko‘prik tumanida qimor o‘ynagan davlat mulozimlari jarimaga tortilgan edi. Huquqbuzarlar sudda sodir etgan huquqbuzarlik harakatiga iqror bo‘lib, qilgan ishidan pushaymonliklarini bildirgan.
Izoh (0)