“AQSH bilan adolatli dunyo qurib bo‘lmaydi” — Erdo‘g‘on

Turkiya prezidenti Rajab Toyyib Erdo‘g‘on AQSH bilan adolatli dunyo qurishning iloji yo‘qligini aytdi.

Avvalroq AQSH G‘azo sektorida zudlik bilan o‘t ochishni to‘xtatishni talab qiluvchi rezolyutsiya loyihasiga veto qo‘ygan edi. Buyuk Britaniya ovoz berishda betaraf qoldi. Xavfsizlik kengashining qolgan 13 a’zosi esa yoqlab ovoz berdi. Hujjatga BMTning kamida 97 aʼzosi hammualliflik qilgan.

“Faqat AQSH o‘t ochishni to‘xtatishga qarshi ovoz berdi. Adolat shunday bo‘ladimi? Adolatli dunyo bo‘lishi mumkin, ammo Amerika bilan emas. AQSH Isroil tomonida. Qo‘shma Shtatlar, bunga qanday javob berasiz?” — dedi Turkiya rahbari.

AQSHning BMTdagi doimiy vakili o‘rinbosari Robert Vud Xavfsizlik kengashining Yaqin Sharqdagi vaziyat bo‘yicha yig‘ilishida “Amerika tomoni G‘azo sektorida zudlik bilan o‘t ochishni to‘xtatish haqidagi chaqiriqlarni qo‘llab-quvvatlamasligini, chunki bu keyingi urush urug‘ini sepishi”ni aytib o‘tgandi.