Ukrainaning professional harbiy kadrlari tugab bormoqda, harbiy yoshdagilar esa xizmat qilishni istamayapti. Bu haqda The Washington Post xabar berdi.
Rossiyaning keng ko‘lamli bosqinidan so‘ng 18 yoshdan 60 yoshgacha bo‘lgan erkaklarning Ukrainani tark etishi taqiqlandi. Ko‘pchilik tibbiy nogironlik, kollejda ta’lim olishning kechiktirilishi yoki oilaviy majburiyatlar sababli harbiy xizmatdan qochishadi.
Kamida harbiy xizmatdan qochgan 25 nafar erkak Ukrainani Moldova va Ruminiyadan ajratib turuvchi Tisa daryosidan o‘tayotganda cho‘kib ketgan. Ammo eng keng tarqalgan qochish yo‘li asosiy chegara o‘tish joylaridir. Ko‘pchilik mamlakatdan chiqib ketish uchun soxta hujjatlarga tayanadi. Boshqalar esa yanada murakkab, hatto umidsiz sxemalarga murojaat qiladi.
“Erkaklar chegara postlaridan o‘tish uchun ayollar qiyofasida kiyinib o‘tishgan holatlar ham bo‘lgan”, — dedi Davlat chegara xizmati bosh boshqarmasi matbuot kotibi Andrey Demchenko.
Yuk mashinalari shirkati xodimi harbiy yoshdagi erkaklarni yuk mashinasi haydovchisi sifatida ro‘yxatdan o‘tkazish uchun pora olgan, ular Polsha chegarasidan o‘tib, g‘oyib bo‘lgan. 20 yoshli yigit nogiron qarindoshi bilan soxta nikohdan o‘tgan va uning vasiysi sifatida mamlakatni tark etishga uringan.
“Hozir hech narsa meni hayratda qoldirmaydi”, — dedi Demchenko.
Prezident Vladimir Zelenskiyning o‘zi muammo borligini tan olgan.
“Ukrainadagi hamma bu sohada o‘zgarishlar zarurligini tushunadi”, — degan u.
Aholisi Ukrainadan uch baravar ko‘p bo‘lgan Kreml bosqindan keyin ikki marta qo‘shimcha qo‘shinlarni chaqirdi. O‘tgan hafta Rossiya prezidenti Putin harbiylarni qariyb 170 mingga oshirib, rus qo‘shinlarining umumiy sonini taxminan 1,32 millionga yetkazishni buyurdi. Ukrainaliklar vaqt Putin tomonida ekanligidan xavotirda.
“To‘g‘risini aytsam, bizga ko‘proq askar kerak. Professional harbiy xizmatchilar tugamoqda”, — dedi 68-brigada hujum guruhi rahbari Delfin o‘tgan oy Ukraina sharqidagi qo‘mondonlik punktidagi og‘ir ahvolni muhokama qilar ekan.
Mudofaa vaziri Rustem Umerov yaqinda Yevropa xavfsizlik forumida Ukrainada 1 million kishi harbiy xizmatda, jumladan, 800 ming kishi qurolli kuchlarda ekanini aytdi. Ammo qurbonlar soni hayratlanarli bo‘ldi, 2023-yil boshida 124,5 mingdan ortiq qurbon bo‘lgan, jumladan, 15,5 mingdan ortig‘i jangda halok bo‘lgani taxmin qilingan.
Ukrainaliklar ko‘pchilik omon qolish uchun kurash deb hisoblagan narsada birdamligicha qolmoqda. Ammo chaqiruv yoshidagi ukrainaliklar bilan suhbatlar shuni ko‘rsatadiki, ko‘pchilik korrupsiya va qobiliyatsiz deb hisoblangan harbiy va milliy hukumat uchun kurashishga unchalik ishtiyoqi yo‘q.
Izoh (0)