Qozog‘istonda deputat Sergey Ponomarev mamlakat 90 foiz qo‘shni davlatlar suviga qaram ekanini aytdi. Suv va irrigatsiya vazirligi unga javob qaytardi. Bu haqda Nur.kz xabar berdi.
Deputatning so‘zlariga ko‘ra, bugungi kunda Qizilo‘rda, Jambil va Atirau viloyatlarida suvning keskin tanqisligi kuzatilmoqda. Suv xo‘jaligi va irrigatsiya vazirining birinchi o‘rinbosari Bolat Bekniyaz esa Qozog‘iston suv resurslarining atigi 1 foizi aholini ichimlik suvi bilan taʼminlashga sarflanishini aytdi. Amaldor parlament deputati bilan suhbat chog‘ida aholini sifatli ichimlik suvi bilan ta’minlash borasidagi ishlar haqida gapirdi.
Jumladan, Qozog‘istonda har yili 102,3 kubokilometr suv zaxirasi to‘planadi, shundan 1,2 kubokilometr, ya’ni umumiy suv hajmining 1 foizdan ortig‘i aholini ichimlik suvi bilan ta’minlashga ketadi. Xo‘jalik ehtiyojlari uchun yillik suv sarfi 25 kubokilometrga yaqin. Ularning 65 foizi qishloq xo‘jaligi, 25 foizi sanoat ehtiyojlariga yo‘naltirilgan.
“Ichimlik suvi taqchil bo‘ladi, deyish mumkin emas, barcha meʼyoriy hujjatlarda va o‘sha Suv kodeksida fuqarolarimizni ichimlik suvi bilan taʼminlash masalasi birinchi o‘rinda turadi. Yaqin 2 yil ichida mamlakatimizning barcha hududlarini markazlashtirilgan suv ta’minoti tizimi bilan ta’minlashni rejalashtirganmiz.
Tabiiy sharoit qanday bo‘lishidan qat’i nazar, iqlim o‘zgarishi yoki transchegaraviy suv resurslarining qisqarishi, bu ichimlik suvi taqchilligiga olib kelmaydi. Chunki aholiga zarur bo‘lgan ichimlik suvi hajmi umumiy yillik suv ta’minotining atigi 1 foizini tashkil etadi”, — dedi suv xo‘jaligi va irrigatsiya vazirining birinchi o‘rinbosari.
Izoh (0)