Rossiya “Vagner” tarkibida Ukrainaga qarshi urushda qatnashgan o‘zbekistonlik 53 yashar Aleksandr Babkovga vaqtinchalik boshpana berdi. Bu haqda “Kommersant” xabar berdi.
Xabarga ko‘ra, Babkovning vaqtinchalik boshpana so‘rab Sverdlovsk viloyatiga bergan arizasi qabul qilingan. Avvalroq jangchi O‘zbekistonga deportatsiya qilinishi va urushda qatnashgani uchun 10 yilgacha ozodlikdan mahrum etilishi mumkinligi ma’lum bo‘lgandi.
“Uning huquqiy holatini hal qilish bo‘yicha birinchi qadam qo‘yildi, keyingi harakatlar algoritmi belgilandi. Mening hamkasblarim hamma narsani imkon qadar tezroq tartibga solishga harakat qiladi. Aleksandr bunga ishonch hosil qilishi mumkin”, — dedi Rossiya Ichki ishlar vazirligi rasmiy vakili.
53 yoshli o‘zbekistonlik “Vagner” tarkibida ko‘ngilli sifatida urushda bo‘lgan. Xizmat va jangovar topshiriqlarni bajargani uchun Aleksandr Babkov “Jasorat uchun” medali va “Vagner”ning ichki mukofotlari bilan taqdirlangan, masalan, Baxmutni (Artemovsk) qo‘lga kiritgani uchun. U Rossiya fuqaroligiga ega emasligi sababli “harbiy faxriy” maqomini olmagan va uning vaqtincha Rossiyada bo‘lish muddati 2024-yil yanvar oyida tugaydi.
Babkovning o‘zi 2023-yil iyul oyida urushda bo‘lganida Rossiya fuqaroligini olish uchun “Vagner” advokatlari orqali hujjatlarni taqdim etgan. Jangchi harbiy urush zonasidan qaytib kelganida, u biriktirilgan Krasnodar o‘lkasidagi harbiy baza yopilgani va “Vagner” kuratorlari qo‘ng‘iroqlarga javob berishni to‘xtatgani ma’lum bo‘lgan.
2023-yil may oyida Rossiya prezidenti Vladimir Putin urushda Rossiya qurolli kuchlarida xizmat qilish uchun yillik shartnoma tuzgan xorijliklar uchun Rossiya fuqaroligini soddalashtirilgan tarzda olish to‘g‘risidagi farmonni imzoladi.
Izoh (0)