“Zo‘rTV” jurnalisti va operatorini kaltaklagan zo‘ravonga hukm o‘qildi (video)

Toshkent shahrida “Zo‘rTV” jurnalisti va operatori kalataklangani, operator shifoxonaga tushgani haqida xabar berilgandi. OAV vakillari faoliyatiga to‘siq qo‘ygan zo‘ravonga sud hukmi o‘qildi. Bu haqda sudda qatnashgan “Daryo” jurnalisti xabar berdi. 

Sud avvalida so‘z olgan sudya Nilufar Dadaboyeva sud muzokaraga o‘tganini ma’lum qildi va so‘zni Toshkent transport prokurori Shukrulla Lutfullayevga berdi. 

Prokuror sud tergovida sudlanuvchi, “O‘zbekiston temir yo‘llari” AJga qarashli “Ko‘prikqurilish” tresti unitar korxonasi 67-ko‘prik qurilish otryadi ish boshqaruvchisi Nodir Eshniyozovning aybi tasdig‘ini topganini aytib, unga nisbatan Jinoyat kodeksining tegishli moddasiga ko‘ra, 4 yil muddatga ozodlikdan mahrum qilish jazosini so‘radi. 

Lekin sudlanuvchining o‘z aybiga iqrorligini, pushaymonligini inobatga olib, muqim ish joyiga egaligi, ish joyida yaxshi tasniflanishini hisobga olib, Jinoyat kodeksining 72-moddasiga ko‘ra, 3 yil muddatga shartli jazo tayinlanishini so‘rayman, — dedi sudda ayblovchi sifatida so‘z olgan Lutfullayev.

Sudlanuvchining advokatlari esa Nodir Eshniyozov sudda barcha aybini tan olsa-da, unga qo‘yilayotgan ayrim ayblovlar sudda dalillar bilan isbotlanmagani inobatga olinishini ta’kidlab, sudlanuvchiga yengilroq jazo berilishini so‘radi. 

Advokatga ko‘ra, telekanal jurnalisti va operatori, shuningdek, ularning yonidagi guvohlar ham “O‘zbekiston temir yo‘llari” AJga qarashli qo‘riqlanadigan obyektga ruxsatsiz kirgan. Bu ayblovga javob qaytargan jurnalist Nurzodbek Vohidov voqea sodir bo‘lgan kuni obyektga kirishdan oldin “O‘zbekiston temir yo‘llari” AJning axborot xizmatiga bog‘lanishga uringanini, ammo javob ololmaganini aytdi. 

Voqea 12-avgust kuni sodir bo‘lgan. Biz 14-avgust kuni voqea joyiga bordik. Ikki kun ichida bizning birorta so‘rovimizga axborot xizmati javob bermadi, — dedi jurnalist. 

Telekanalning kaltaklangan operatori Sardorbek Yo‘ldoshev sudda so‘z olar ekan, kaltaklanganidan so‘ng sog‘lig‘i yomonlashganini, singan burnini operatsiya qildirish uchun 15 million so‘m so‘rashganini, o‘zi ancha vaqtgacha ishlolmay qolib, onasi ham betob bo‘lib qolganini aytdi. 

Ma’naviy zarar uchun 300 million, moddiy zarar uchun 15 million so‘m so‘rayman, — dedi jabrlanuvchi. 

“Zo‘rTV” kanali vakili esa telekanalga yetkazilgan zarar uchun 23 million 755 ming so‘m tovon puli talab qilayotganini ochiqladi. 

Jamiyatda yurish-turish qoidalarini qo‘pol buzdim. Buni tan olaman. Lekin Nurzodbekka qo‘l tekkizmadim. Qo‘pol muomala ham qilmadim. Qo‘pol muomalam o‘sha yerdagi qo‘riqchilarga nisbatan ishlatilgan. Ular mening shaxsiy vaziyatimni tasvirga olishgani uchun qarshilik qilganman. Bundan afsusdaman, pushaymonman va jabrlanuvchilardan kechirim so‘rayman. Suddan yengilroq jazo berishni so‘rayman, — dedi sudlanuvchi Nodir Eshniyozov.

Sud sudlanuvchi Nodir Eshniyozovni Jinoyat kodeksining 277-moddasi 3-qismi “a” va “g” bandlarida ko‘rsatilgan jinoyatni sodir etganlikda aybdor deb topib, unga dastlab 4 yil muddatga ozodlikdan mahrum qilish jazosi tayinladi. Sudlanuvchiga Jinoyat kodeksining 72-moddasi qo‘llanib, hukmning shartliligi e’lon qilindi va aybdorga 2 yillik sinov muddati belgilandi. 

Sudlanuvchidan “Zo‘rTV” kanali foydasiga yetkazilgan zarar uchun 23 million 755 ming 641 so‘m mablag‘ undirildi.