“O‘zbekiston rahbari Markaziy Osiyoni yanada rivojlantirishning ‘optimal formulasi’ni e’lon qildi” — Eldor Aripov

4-dekabr kuni BMTning Nyu-Yorkdagi shtab-kvartirasida bo‘lib o‘tgan “Global va mintaqaviy kun tartibining dolzarb masalalari: O‘zbekiston nuqtayi nazari” mavzusidagi brifingda Strategik va mintaqalararo tadqiqotlar instituti (SMTI) direktori Eldor Aripov maʼruza qildi.

Brifing O‘zbekiston prezidentining BMT Bosh assambleyasining sentyabr oyida bo‘lib o‘tgan 78-sessiyasida  qilgan chiqishi va tashabbuslariga bag‘ishlandi.

“Markaziy Osiyo mintaqasining ayni markazida joylashgan, dinamik yangilanayotgan O‘zbekiston mintaqaviy kontekstdagi ijobiy o‘zgarishlar katalizatoriga aylanmoqda.

O‘zbekiston prezidenti qo‘shnilar bilan munosabatlarni yaxshilashni tashqi siyosatning asosiy ustuvor yo‘nalishi deb e’lon qilar ekan, avvallari hamkorligimizga to‘sqinlik qilayotgan barcha masalalarda – chegaralarni delimitatsiya va demarkatsiyadan tortib, suvdan foydalanishgacha bo‘lgan masalalar bo‘yicha murosaviy yechim topishga tayandi”, — dedi SMTI direktori Eldor Aripov brifingdagi nutqida.

“O‘tmishdagi tajribamizdan achchiq xulosa olgan holda, ziddiyatlar muammoni hal qilmasligini, balki yanada og‘irlashtirishini anglab, siyosiy irodaga tayandik va haqli ravishda faxrlanadigan natijalarga erishdik”, — dedi Aripov.

Uning so‘zlariga ko‘ra, avvallari tez-tez to‘qnashuvlar va kelishmovchiliklar bilan to‘lib-toshgan, chegaralar yopiq, savdo-sotiqning muzlatilganligi bilan ajralib turadigan mintaqa endi o‘zining salbiy merosidan ishonch bilan qutulyapti.

Chegara o‘tkazish punktlari ochila boshladi, odamlar o‘z qarindoshlari va yaqinlarini ko‘rish imkoniyatiga ega bo‘ldilar, savdo-sotiq, gumanitar aloqalar faollashdi. Mintaqaviy hamkorlik institutlari va mexanizmlari vujudga keldi.

“Faqat prezident Shavkat Mirziyoyev taklif qilgan ochiqlik, muloqot va hamkorlik bu yerga tashqi kuchlarni konstruktiv jalb etish uchun sharoit yaratadi, bir tomondan, ziddiyatlar va qarama-qarshiliklardan holi, mintaqalararo hamkorlik va sheriklik makonini shakllantirish uchun zamin yaratadi. Boshqa tomondan, tovar va xizmatlar, investitsiyalar va innovatsiyalar uchun keng bozor ochadi”, — dedi SMTI direktori Eldor Aripov

“Mohiyatiga ko‘ra, bu O‘zbekiston rahbari tomonidan taklif etilgan optimal formula bo‘lib, Markaziy Osiyo davlatlarining ham, xorijiy hamkorlarimizning ham manfaatlariga javob beradi”, – deya qo‘shimcha qildi u.

Uning fikricha, bu ham Markaziy Osiyoda xavfsizlik va barqarorlikni ta’minlashning eng muhim shartiga aylanib bormoqda.