Rossiya Mudofaa vazirligining ma’lum qilishicha, 5-dekabrga o‘tar kechasi Azov dengizi va Qrimda o‘nlab Ukraina dronlari “yo‘q qilindi”.
Dastlab vazirlik matbuot xizmati Rossiya havo hujumidan mudofaa kuchlari Azov dengizi va Qrim hududida 22 ta dronni urib tushirganini aytdi. Mudofaa vazirligi maʼlumotlariga ko‘ra, yana 13 ta uchuvchisiz uchar apparat tutib olingan.
Ko‘p o‘tmay, harbiylar Azov dengizi ustida yana to‘rtta dron urib tushirilgani va ikkitasi tutib olingani haqida xabar berdi. Mudofaa vazirligi tungi hujum oqibatlarini ochiqlamadi.
Shu bilan birga, anneksiya qilingan Qrim aholisi Kerch, Feodosiya va Eski Qrim hududlarida qator portlashlar sodir bo‘lganini ma’lum qildi.
Qrim ko‘prigida transport harakati to‘rt soatdan ko‘proq vaqtga to‘xtatildi, tongda qayta tiklandi.
Mahalliy hukumat hozircha voqea yuzasidan izoh bermagan.
Ukraina harbiylari anneksiya qilingan Qrim hududiga muntazam zarbalar berib kelmoqda. Xususan, noyabr oyi boshida Kerchdagi Butoma nomidagi “Zaliv” kemasozlik zavodiga raketa urilgan, buning oqibatida Rossiya harbiy-dengiz kuchlarining kemalaridan biri shikastlangan.
Izoh (0)