“Har biringiz qahramon, fidoyisiz”. Qarshi tumani hokimi tadbirkorlar bilan muloqot qildi

Qashqadaryo viloyatining Qarshi tumani hokimi Zoir Aliqulov hududda faoliyat yurituvchi tadbirkorlar bilan muloqot qildi. Bu haqda “Daryo”ga xabar bergan tuman hokimligi axborot xizmati rahbari To‘lqin Turdiyevning ma’lumot berishicha, mazkur muloqot Zoir Aliqulovning Qarshi tumani hokimi sifatidagi tadbirkorlar bilan dastlabki muloqoti hisoblanadi. 

Xorijiy va eksportyor korxonalar, yosh tadbirkorlar, tadbirkor ayollar va turli sohada faoliyat yurituvchi tumanimizdagi ishbilarmon fuqarolar bilan o‘tkazilgan ushbu uchrashuv samimiy va natijalarga boy tarzda o‘tdi, — deydi To‘lqin Turdiyev uchrashuv haqida gapirar ekan. 

Zoir Aliqulov tadbirkorlar bilan suhbatlashar ekan, har bir tadbirkorni kunning istalgan vaqtida qabul qilishga tayyorligini, muammosini eshitishga shayligini aytgan. 

“Sizlarning har biringiz qahramonsiz, fidoyisiz”, deya prezidentimiz bejiz ta’kidlamaydi. Sizning mehnatingiz ortidan qancha tumandoshlarimizning ro‘zg‘ori but bo‘lmoqda. Bugun rasmiyatchilik uchun sizlarning muammolaringizni tinglamadim. Har bir murojaatingiz bayonlashtiriladi. O‘rganish natijalarini o‘zim yoki mas’ul o‘rinbosarlarim bog‘lanib, ma’lum qilamiz. Vakolatimiz doirasida ko‘mak ko‘rsatamiz. Sizlar uchun telefonim uzluksiz ishlaydi. 24 soat ko‘makka shaymiz, — deydi tuman rahbari. 

Qo‘shimcha qilinishicha, qabulda tadbirkorlar murojaatining o‘z vaqtida yechim topishi uchun mas’ul belgilangan.

Murojaatlar shu joyning o‘zida muhokama etilib, tegishli mas’ullarga qo‘shimcha topshiriqlar berildi. Ular bajarilishini nazorat qilish tuman hokimining birinchi o‘rinbosari Hasan Turdiyevga yuklandi, — deydi tuman hokimining matbuot kotibi To‘lqin Turdiyev. 

Hokimlik mas’ulining qo‘shimcha qilishicha, tumanda hashar yo‘li bilan mahallalarning ichki ko‘chalarini shag‘allashtirish ishlari ham boshlab yuborilgan. 

Har bir mahalladagi ta’mirtalab ichki ko‘chalarga hashar yo‘li bilan kirib borib, obod qilib chiqib ketamiz. Prezidentimizning bugungi bizga yuklagan eng muhim vazifalari xalqimiz roziligi va mahallalar obodligidir, — degan tuman rahbari Zoir Aliqulov ichki ko‘chalarni shag‘allashtirish haqida gapirar ekan.

Yashab turgan mahallasidagi ta’mirtalab yo‘llarning epaqaga kelayotganidan quvongan aholi mas’ullarga, davlat rahbariga tashakkur izhor etmoqda. 

Aytsak hech kim ishonmaydi, bir kun ichida qishlog‘imizdagi barcha muammolar hal etildi, — deydi qilinayotgan ishlardan quvongan fayzobodlik otaxon.