Toshkent shahrida bir ayolning suratlariga ishlov berib, uni ijtimoiy tarmoqlarda tarqatgan shaxs qo‘lga olindi, deb xabar beradi “Xalq so‘zi onlayn”.
Qayd etilishicha, Qashqadaryo viloyati Kitob tumanida yashovchi 29 yoshli (ayol) S.F. murojaat qilib, o‘zining uyatli foto hamda videotasvirlari nomaʼlum shaxs tomonidan Telegram messenjerida tarqatib yuborilganini maʼlum qilgan.
Tezkor-qidiruv xizmati Kiberxavfsizlik bo‘linmalari tomonidan o‘tkazilgan tezkor-qidiruv tadbirlari natijasida, ushbu jinoyatni Toshkent shahri Chilonzor tumanida yashovchi 17 yoshli Z.S. sodir etgani aniqlangan.
Ma’lum bo‘lishicha, fuqaro Z.S. Telegram messenjerida jabrlanuvchi S.F.ning profilidan u joylashtirgan fotosuratlarini yuklab olib, maxsus dasturlardan foydalanib ishlov berib, tarqatib yuborgan.
Mazkur holat yuzasidan Jinoyat kodeksining 141/3-moddasi (shaxsning sha’nini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi ma’lumotlarni oshkor qilish) 2-qismi “v” bandi bilan jinoyat ishi qo‘zg‘atilgan. Z.S.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.
Eslatib o‘tamiz, iyul oxirlarida Buxoro shahrida erkak bilan ishqiy munosabatda bo‘lib, uni turmush o‘rtog‘iga oshkor qilmaslik evaziga telefon talab qilgan qiz qo‘lga olingandi. May oyida Toshkentda ayolning foto-videolarini eri va qaynotasiga ko‘rsatishini aytib, undan pul talab qilgan erkak ushlangani, Toshkent viloyatida 19 yoshli qizning suratlarini tarqatish bilan tahdid qilgan yigit qo‘lga tushgani to‘g‘risida xabar berilgandi.
Izoh (0)