Shavkat Mirziyoyev tashrifning ishbilarmonlik dasturidagi navbatdagi uchrashuvini Amea Power kompaniyasi raisi Husayn Al-Novays bilan o‘tkazdi. Bu haqda Prezident matbuot xizmati xabar berdi.
Uchrashuvda, O‘zbekistonda eng avvalo, “yashil” energetika va turizm infratuzilmasini rivojlantirish sohalarida qo‘shma investitsiya loyihalarini amalga oshirish istiqbollari ko‘rib chiqildi. Kompaniyaning O‘zbekistonda faoliyat yuritish borasidagi rejalari qo‘llab-quvvatlandi.
Shuningdek, Shavkat Mirziyoyev 2-dekabr kuni BAAning SWS kompaniyasi bosh ijrochi direktori Ahmad Al-Shamsiy bilan uchrashuv o‘tkazdi.
Uchrashuvda kompaniyaning O‘zbekiston hududlarida suv taʼminoti va suvni tozalash sohalaridagi loyihalarni qo‘llab-quvvatlash va amalga oshirish, bunda xalqaro sheriklarni, shu jumladan, Fransiyaning SUEZ va Yaponiyaning Marubeni kompaniyalarini jalb qilish borasidagi rejalari ko‘rib chiqildi.
Shu bilan birga O‘zbekiston prezidenti Dubay shahrida Air Products kompaniyasi boshqaruvi raisi Seyfi Gasemini qabul qildi.
Qabul davomida kompaniya bilan hamkorlikni, eng avvalo, yuqori texnologik tarmoqlarda yanada kengaytirishning amaliy jihatlari ko‘rib chiqildi. Davlat rahbariga joriy loyihalarning borishi va yangilariga tayyorgarlik holati taqdimot qilindi.
Tadweer kompaniyasi bosh ijrochi va boshqaruvchi direktori Ali al-Daheriy bilan uchrashuvda esa amirliklar kompaniyasining O‘zbekistonda elektr energiyasini ishlab chiqarish loyihalarini amalga oshirish, bunda ilg‘or texnologik yechimlarni joriy qilish rejalari ko‘rib chiqildi.
Izoh (0)