Ukrainaga qarshi urushda qatnashgan qozog‘istonlikka hukm o‘qildi

Qozog‘istonda “Vagner” jangchisi Ukrainadagi urushda qatnashgani uchun olti yilu sakkiz oyga qamoq jazosiga hukm qilindi. Bu haqda “RBK” xabar berdi.

Ayblanuvchi Aleksey Shompolov Krasnoyarsk o‘lkasidan, lekin Qozog‘iston fuqaroligiga ega. U Jinoyat kodeksining 170-moddasi 3-qismi (konstitutsiyaviy tuzumni ag‘darish va buzishga yoki davlatning hududiy yaxlitligini buzishga qaratilgan qurolli konfliktda, harbiy va boshqa zo‘ravonlik harakatlariga yollanish) bilan aybdor deb topildi.

Sud qaroriga ko‘ra, Shompolov mart oyida “VKontakte” orqali Qarag‘andada bo‘lganida, pul evaziga “Vagner” safida Ukrainaga qarshi urushishga rozi bo‘lgan. Shundan so‘ng u Rossiyaga tayyorgarlik ko‘rish uchun ketgan. Aprel oyining oxirida u Baxmutga (Artemovsk) yuborilgan, u yerda janglarda qatnashgan va yaralangan.

Erkak aybini tan olgan, sud uning iqrorini inobatga olgan. “Vagner”dan olingan mablag‘lar musodara qilingan. “Vagner”da unga Zubrak taxallusi berilgan. U 24-apreldan 13-maygacha artilleriya guruhi tarkibida Baxmut yaqinida jang qilgan, biroq o‘q otish vaqtida tirsagidan yaralangan va Luganskdagi kasalxonaga yetkazilgan. U “Vagnerdan” 235 ming rubl (taxminan 2 ming 654 dollar) olgan.