Rossiyaga qarshi operatsiyaga mas’ul ukrain amaldorlari organizmida margimush va simob topildi

Ukraina razvedka xizmati xodimlari, shuningdek, razvedka boshlig‘i Kirill Budanovning rafiqasi Marianna og‘ir metallar, jumladan, mishyak (margimush) va simob bilan zaharlangan. Bu haqda Bosh razvedka boshqarmasi va Tashqi razvedka xizmatining sobiq rahbari Valeriy Kondratyukka tayanib, NV xabar berdi.

“Menda hali oshkor etilmagan shunday maxfiy ma’lumotlar bor. Og‘ir metallar bilan zaharlanish yuz berdi. Tahlil davomida mishyak va simob kabi metallar topilgan. Bu nafaqat Kirill Budanovning rafiqasiga, balki Bosh razvedka boshqarmasining bir nechta xodimlariga ham aloqador.

Gap Budanovning rafiqasi bilan bo‘lgan soqchilar haqida ketmayapti. Gap yuqori martabali amaldorlar — alohida hududlar rahbarlari haqida bormoqda, ular Rossiyadagi operatsiya uchun alohida mas’uldirlar”, — dedi Kondratyuk.

Uning so‘zlariga ko‘ra, tergov zahar jabrlanuvchilarning tanasiga qanday kirib kelganini hozircha aniqlay olmagan. Marianna Budanova va Ukraina razvedka xizmatining bir necha xodimlari zaharlangani 28-noyabr kuni ma’lum bo‘ldi. “Ukrainska pravda” nashri manbalari ular ovqatdan zaharlangan bo‘lishi mumkinligini taxmin qilmoqda.