Ijtimoiy tarmoqlarda 25-noyabr kuni Namangan viloyati Chust tumanida olib borilgan majburiy ijro harakatlari aks etgan videolavha tarqaldi. Videoda bank, MIB va IIO xodimlari xonadondan qarzdorlikni undirish maqsadida ikki bosh qora molni olib ketishga urinayotgani, lekin uy egasi qarshilik qilganini ko‘rish mumkin.
Ayol undiruvchi xodimlarga eri bilan gaplashishi kerakligini, mol uning ota-onasining puliga kelganini qayta-qayta aytadi. Bu jarayonda bir bola molini olib ketishayotgani uchun yig‘layotgani eshitilgan.
Holat yuzasidan MIB axborot xizmati “Daryo”ga izoh berdi. Aytilishicha, mazkur holat Majburiy ijro byurosi Namangan viloyat boshqarmasi ishchi guruhi tomonidan o‘rganilgan.
“Qarzdor B.J.dan bank foydasiga 36 million so‘m undirish ko‘rsatib o‘tilgan. Unga ixtiyoriy muddat berilgan, biroq ana shu vaqt ichida B.J. qarzni to‘lash o‘rniga turli bahonalar bilan to‘lovni paysalga solgan. Shundan keyin davlat ijrochisi tomonidan majburiy ijro harakatlari olib borilgan.
Ishchi guruh qarzdorlik evaziga yashash ehtiyojidan ortiqcha bo‘lgan mol-mulklari, aniqrog‘i, qoramolni xatlash uchun olib chiqishadi”, — deyiladi MIB axborotida.
Qo‘shimcha qilinishicha, undiruv harakatlari vaqtida sud buyrug‘iga aloqasi bo‘lmagan, yaʼni qarindoshi kelib ijro harakatlariga keskin to‘sqinlik qiladi. Ijro harakatlarida tartibni saqlash uchun xizmat olib borayotgan ichki ishlar organlari xodimlari talablariga bo‘ysinmay, ovoza ko‘targan.
Mazkur holat yuzasidan tegishli bayonnoma rasmiylashtirilib, amaldagi tartibga ko‘ra vaqtinchalik ushlanib, qonuniy chora ko‘rish uchun IIB Chust tuman bo‘limiga olib kelinadi va 5 sutkalik maʼmuriy qamoq chorasi ko‘rilgan.
Bundan tashqari, ijtimoiy tarmoqlarda qarzdorlik evaziga 10 bosh qo‘y xatlanayotgan jarayon aks etgan video bo‘yicha ham MIB axborot xizmati qo‘shimcha izoh berdi.
Aniqlanishicha, fuqarolik ishlari bo‘yicha Chust tumanlararo sudining buyrug‘iga ko‘ra qarzdor S.A. bank foydasiga 40 million 68 ming so‘m undirish belgilangan. Qarzdor bir necha bor ogohlantirilgan. Biroq qarzdorlik bartaraf etilmagani uchun majburiy ijro harakatlari olib borilgan. Ammo qarzdorlik to‘lanmagani sababli 10 bosh qo‘y xatlangan.
Izoh (0)