Ostonada yashovchi Natalya Sviridenko (Merkulova) TikTok ijtimoiy tarmog‘idagi efir vaqtida qozoq millati vakillarini ochiqchasiga haqorat qilgani va ularni “bir-birini o‘ldirishga” chaqirgani uchun to‘rt yilga ozodlikdan mahrum etildi. Sud tegishli qarorni 23-noyabr kuni qabul qilgan, deb xabar bermoqda KazTAG.
Aniqlik kiritilishicha, Sviridenko Qozog‘iston Jinoyat kodeksining 174-moddasi 1-qismi (Ijtimoiy, milliy, qabilaviy, irqiy, sinfiy yoki diniy adovatni qo‘zg‘atish) bo‘yicha aybdor deb topilgan. Mahkuma jazoni o‘rtacha tartibli koloniyada o‘taydi.
Sud hujjatlarida qayd etilganidek, voqea 7-avgust kuni yuz bergan. Ostonalik ayol mast holda TikTok’da o‘zining “Qirolicha 2” akkaunti orqali translyatsiya qilgan. Efir vaqtida o‘z obunachilari orasida qozoq millatiga mansub shaxslar borligini bilgach, ayol ularni qattiq haqorat qila boshlagan. So‘kinishlardan tashqari, Sviridenko qozoqlarni maymunlarga tenglashtirgan, foydalanuvchilardan birini “kasal” deb atagan, shuningdek, butun respublikani qamrab olgan 2022-yil yanvardagi norozilik namoyishlarida etnik qozoqlarni ayblagan.
“Shu tariqa Sviridenko N.V. telekommunikatsiya tarmoqlaridan foydalangan holda, milliy adovatni qo‘zg‘atishga, fuqarolarning milliy sha’ni va qadr-qimmatini kamsitishga qaratilgan qasddan harakatlar sodir etgan”, — deyiladi sud hukmida.
Shuningdek, ish materiallarida qayd etilishicha, mahkumaning so‘zlarida talon-taroj qilish va jamoat tartibini buzish, o‘zgalarning mulkini noqonuniy tortib olishga ochiq chaqiriqlar bor, uning harakatlari ijtimoiy xavfli bo‘lib, mamlakat xalqi birligiga qarshi qaratilgan.
Bundan tashqari, Sviridenkoning so‘zlarini konstitutsiyaviy tuzumni buzish chaqiriqlari sifatida qabul qilish mumkinligi va uning ayrim foydalanuvchilarga nisbatan haqoratlari Qozog‘iston va Rossiya o‘rtasidagi do‘stona munosabatlarga putur yetkazishi mumkinligi taʼkidlangan.
Izoh (0)