Moskvadagi Lefortovo sudi Rossiya rasmiylari tomonidan josuslikda ayblangan Amerikaning The Wall Street Journal (WSJ) nashri muxbiri Evan Gershkovichni hibsga olish muddatini ikki oyga uzaytirdi.
Moskva umumiy yurisdiksiya sudlarining Telegram-kanaliga ko‘ra, ehtiyot chorasi 2024-yil 30-yanvargacha uzaytirildi. Gershkovichni hibsda saqlash muddati jami 10 oyga cho‘zildi.
Gershkovichning hibsga olinishi
Evan Gershkovich 2023-yil mart oyi oxirida Yekaterinburgda hibsga olingan va josuslikda ayblangan. Federal xavfsizlik xizmati maʼlumotlariga ko‘ra, jurnalist “Amerika tomonining ko‘rsatmasi bo‘yicha Rossiya harbiy-sanoat kompleksi korxonalaridan birining faoliyati to‘g‘risida davlat sirini tashkil etuvchi maʼlumotlarni to‘plagan”.
FXX tushuntirishicha, jurnalist “maxfiy ma’lumotlarni olishga urinayotganda” hibsga olingan. Keyinroq Rossiya prezidenti matbuot kotibi Dmitriy Peskov Gershkovichning “pora ustida ushlanganini” aytdi. Gershkovichning himoyachisi jurnalist bu ayblovlarni tan olmasligini ta’kidladi. Amerikalik muxbir Moskvadagi Lefortovo tergov izolyatorida saqlanmoqda.
Izoh (0)