Surxondaryo viloyatining Termiz shahri hokimi O‘ktam To‘rayev IIB boshlig‘iga og‘zaki topshiriq berib, tadbirkorni 15 sutkaga qamatishga uringani to‘g‘risida xabar berilgandi. Termiz shahar hokimligining mazkur holatga munosabatida aytilishicha, tadbirkorga nisbatan jarima chorasi qo‘llanilgan.
Qayd etilishicha, mutasaddilar, keng jamoatchilik faollari ishtirokida Termiz shahri bo‘ylab bunyodkorlik ishlarining borishi ko‘zdan kechirilganda, chiqindixonalardagi to‘planayotgan chiqindilar o‘z vaqtida olib ketilmayotgani haqida aholi tomonidan norozilik bildirilgan.
Shu bois, o‘rganish jarayonidagi mazkur ishlarga bevosita masʼul va javobgar bo‘lgan “Bio texno eko” MCHJ tomonidan chiqindixonadagi chiqindilarni olib ketish ishlari o‘z holiga tashlab qo‘yilgani, o‘ziga yuklatilgan vazifalarni muntazam ravishda bajarmasdan kelayotgani va shaharni obodonlashtirish qoidalarini buzgani sababli ichki ishlar organlari tomonidan huquqiy baho berilishi so‘ralgan.
Termiz shahar IIB tomonidan holat batafsil o‘rganilgan va o‘rganishlar natijalariga ko‘ra to‘plangan hujjatlar asosida “Bio texno eko” MCHJ rahbari Shuhrat Shernazarovga nisbatan Maʼmuriy javobgarlik to‘g‘risidagi kodeksning 161-moddasiga (shaharlarni va boshqa aholi punktlarini obodonlashtirish qoidalarini buzish) asosan, BHMning 1 baravari, yaʼni 330 ming so‘m miqdorida jarima qo‘llash bo‘yicha bayonnoma tuzilgan.
Ushbu holat 26-noyabr kuni ham shahar hokimligi axborot xizmati tomonidan xolis baho berish uchun qayta o‘rganilgan.
Ijtimoiy tarmoq foydalanuvchilari hamda kuzatuvchilaridan shahar hokimligi tadbirkorlarni doimo qo‘llab-quvvatlashga tayyor ekanligini maʼlum qilgan holda tasdiqlanmagan va asoslanmagan maʼlumotlarga ishonmaslikni va tarqatmaslikni so‘raymiz, — deyiladi munosabatda.
Izoh (0)