Rossiya Ichki ishlar vazirligi Meta kompaniyasi matbuot kotibi Endi Stounni federal qidiruvga berdi. Bu haqda IIV ma’lumotlariga tayanib, “Kommersant” xabar berdi.
Xabarga ko‘ra, qidiruv kartasi maʼlumotlar bazasida 2023-yilning fevralida paydo bo‘lgan, biroq unga hozirgina eʼtibor berilgan. Shu bilan birga, noyabr oyida Rossiya sudlaridan biri Stounni terrorizmni targ‘ib qilish (Jinoyat kodeksining 205.1-moddasi 2-qismi) moddasi bo‘yicha sirtdan hibsga olishga qaror qilgan.
2022-yil mart oyida Rossiya Tergov qo‘mitasi Meta xodimlariga, jumladan, Stounga nisbatan ekstremistik faoliyatga chaqirish va terrorchilik faoliyatiga yordam berish moddalari bo‘yicha jinoiy ish qo‘zg‘atgan. Bunga kompaniyaning ijtimoiy tarmoqlarda rossiyalik harbiylarga nisbatan zo‘ravonlik chaqiriqlarini bloklamaslikka qaror qilgani sabab bo‘lgan.
O‘sha oyda Rossiya rasmiylari kompaniyaning Facebook va Instagram tarmoqlarini bloklab qo‘ygan va Metaning o‘zini “ekstremistik” tashkilot deb topgan.
Izoh (0)