“15 sutkaga tiqasan, kimi kelsa ham chiqarmaysan”. Termiz hokimi qonun himoyachilarining ko‘z o‘ngida O‘zbekiston qonunlarini oyoqosti qildi

Surxondaryo viloyatining Termiz shahri hokimi O‘ktam To‘rayevning zo‘ravonligi O‘zbekistondagi mavjud qonunchilikning oyoqosti bo‘lishiga olib keldi. Hokim bu qilmishini qonun himoyachilarining ko‘z o‘ngida amalga oshirdi. Shahar hokimi IIB boshlig‘iga og‘zaki topshiriq berib, tadbirkorni 15 sutkaga qamatishga urindi. Ammo jamoatchilik e’tirozi bunga yo‘l qo‘ymadi. 

Hokim yig‘ilish paytida shahar IIB boshlig‘iga topshiriq berib, tezda olib borib 15 sutkaga tiqasan va jarimaga tortasan dedi. Kimi kelsa ham chiqarmaysan deb topshiriq berdi, — deydi hokim zo‘ravonligi sabab qamalib, uch soatdan ortiq IIB binosida ushlab turilgan tadbirkor.

“Daryo” jurnalisti bilan suhbatda bo‘lgan surxondaryolik tadbirkor, Shuhrat Shernazarovning aytishicha, u Termiz shahrida aholi tomonidan chiqindi konteynerlariga tashlangan chiqindini tashish bilan shug‘ullanuvchi “Bio texno eko” MCHJ rahbari sifatida faoliyat yuritadi. 

Tadbirkorning aytishicha, hokim zo‘ravonligi uning shaxsiy kabinetida, yig‘ilish paytida sodir bo‘lgan. 

Hokim meni qamatish haqidagi gapidan oldin yoniga chaqirib olib, bo‘ynimga musht qo‘yib, tashkilot rahbarlarining oldida itarib yubordi. Yiqilib tushishimga sal qoldi, o‘zimni o‘nglab oldim, — deydi tadbirkor.

Suhbatdoshning aytishicha, hokimning og‘zaki topshirig‘idan so‘ng, shahar IIB boshlig‘i O‘tkir Shukurov shahar IIBdagi xodimlarini chaqirgan. 

“Gorotdel”dan ikkita bola keldi. “Uchastkavoy”lar emas edi. Kelganlar hokimning xonasida qo‘limga kishan taqishga urindi. Ularni itarib tashlab, qo‘limga kishan taqish shartmas, o‘zim boraman dedim. Meni “gorotdel”ga olib ketishdi, — deydi tadbirkor. 

“Bio texno eko” MCHJ rahbarining ma’lumot berishicha, uni soat taxminan kechki 8 larda olib ketib, kechasi 11:30 larda qo‘yib yuborishgan. 

Ularga qandaydir xabar keldimi, nimadir bo‘ldi. Shundan so‘ng qo‘yib yuborishimiz kerak dedi, — deydi uch soatdan ortiq qamab qo‘yilgan tadbirkor. 

Shuhrat Shernazarovning tushuntirishicha, unga aholi tomonidan shaharning belgilanmagan hududiga tashlab ketilgan chiqindini o‘z vaqtida yig‘ishtirib olmaslik, shahardagi lotoklarni tozalamaslik aybi qo‘yilgan. 

Fuqaro ishga ketayotgan paytda shoshib, chiqindini belgilanmagan joyga, deylik yo‘l yuziga tashlab ketyapti. Izidan yana ikki-uch kishi shu ishni takrorlab, shaharda chiqindi uyumi paydo bo‘lyapti. Hokim esa menga shu belgilanmagan hududga tashlangan chiqindini olmagansan degan aybni qo‘yyapti. Bunday ish mening majburiyatimda yo‘q. Bu ishni Obodonlashtirish boshqarmasi qilishi kerak. Keyin yana menga “lotok”lar ichini ham tozalamading deb zulm o‘tkazdi. Men esa chiqindi konteynerlaridagi chiqindini olib ketishga vakolatli ekanimni aytdim, — deydi suhbatdosh. 

Tadbirkorning tan olishicha, hokim va uning o‘rtasida shaxsiy adovat yo‘q. Ilgari qilingan ish uchun hokimdan rahmat eshitgan paytlari ham bo‘lgan. 

Hokim yaxshi ishlayapsan, rahmat deb ko‘p aytgan. Lekin o‘sha kuni shunaqa holat ro‘y berdi. Davlat tashkilotlari bizdan 1,5 milliardga yaqin qarzdorligi bor. Aholining esa salkam 15 milliard so‘mlik qarzdorligi bor. Buni undirish bo‘yicha bizga hech kim yordam bermayapti, — deydi u.

Shuhrat Shernazarovning voqeani esga olishicha, hokim zo‘ravonligi ro‘y bergan yig‘ilishda 14-15 nafar tashkilot rahbarlari bilan birga, qonun himoyachilari ham bo‘lgan.

Nachalnik melisa bor edi. Shahar prokurorining o‘zi bo‘lmasa-da, xodimlari bor edi, — deydi tadbirkor.

“Bio texno eko” MCHJ rahbarining qo‘shimcha qilishicha, hokimning jahlini chiqargan yana bir holat, uning hokim yordamchisi qilgan qo‘ng‘iroqqa o‘z vaqtida javob berolmagani bo‘lgan. 

Kompaniyada o‘zimizning ichki yig‘ilishimiz bo‘layotgan paytda hokim yordamchisi qo‘ng‘iroq qilgandi. Men javob berolmaganman. Hokim yordamchisi telefon qilishidan bir soat oldin u bilan gaplashgandim. Shunga qaramasdan hokim “pomoshnikning nomerini ko‘tarmaysan iflos”, deya haqorat qildi. Men qilgan ishimga, 24 soat uxlamay shaharning tozaligini qilayotgan mehnatimga achinaman. Doim shaharni toza va ozoda saqlayman, — deydi tadbirkor. 

Tadbirkorning bildirishicha, u o‘ziga biriktirilgan vazifalarni ko‘ngildagidek bajarish uchun yaqinda 3 million dollarga 30 ta yangi texnika olib kelgan.

Maqsadi yaxshimas, nazarimda. Bir yildan beri tashkilotimni yopishga urinishyapti. Texnikani bahona qilishgandi. Mana 30 ta yangi texnikani 3 million dollarga olib kelib qo‘ydim. 24 soat ishlayapti. Shunga qaramay yana bahona qilishyapti. Investitsiya kiritganimdan pushaymon bo‘lyapman, — deydi tadbirkor. 

“Daryo” manbasining ma’lumot berishicha, shahar hokimi talabi bilan mahalla raislariga topshiriq berilib, tadbirkorning ishidan kamchilik topish, uni mahalliy OAVlar orqali sazoyi qilish haqida topshiriq berilgan. 

“Daryo” voqealar rivojini kuzatishda davom etadi.