Eron Ukrainaga qarshi urushda foydalanish uchun Rossiyaga ballistik raketalar berishni ko‘rib chiqmoqda. Bu haqda Oq uy vakili Jon Kirbi ma’lum qildi.
Shuningdek, u Eron va Rossiya o‘rtasidagi munosabatlardagi vaziyatni AQSH muntazam kuzatib borishini va kerak bo‘lsa, tegishli choralar ko‘rishini aytdi, deb yozadi Reuters.
Kirbining qayd etishicha, Eron avvalroq Rossiyaga dronlar, boshqariladigan bombalar va artilleriya o‘q-dorilarini yetkazib bergan.
“Eron Rossiyani qo‘llab-quvvatlash bo‘yicha yana bir qadam tashlashga tayyorlanayotgan bo‘lishi mumkin. Biz Ukrainada foydalanishi uchun Eron Rossiyaga ballistik raketalar berish imkoniyatini ko‘rib chiqayotganidan xavotirdamiz”, — dedi u.
Kirbining aytishicha, bu yordam evaziga Rossiya Tehronga raketalar, elektronika va havo hujumidan mudofaa kabi sohalarda hamkorlikni taklif qilgan. Eron Rossiyadan milliardlab dollarlik harbiy texnika, jumladan hujumchi vertolyotlar, radarlar va jangovar trenajyorlar sotib olmoqchi.
AQSH ushbu “vaziyatni beqarorlashtiruvchi tashish” bilan shug‘ullanishi mumkin bo‘lgan rossiyalik jismoniy va yuridik shaxslarga qarshi terrorizmga qarshi sanksiyalardan foydalanishga tayyor edi, dedi Kirbi.
Izoh (0)