Isroil g‘azoliklar boshpana sifatida foydalanayotgan maktabga hujum qildi. Qurbonlar bor

Isroil armiyasi BMTning Falastinlik qochqinlarga yordam ko‘rsatish agentligiga qarashli maktabni o‘qqa tutishi oqibatida kamida 12 kishi halok bo‘ldi, o‘nlab kishilar yaralandi. Bu haqda “RIA Novosti” xabar berdi.

“Isroil artilleriyasi G‘azo sektorining shimoliy qismidan ko‘chirilganlar istiqomat qilayotgan Al-Burayj lageri hududidagi maktabni o‘qqa tutdi. Oqibatda kamida 12 kishi halok bo‘ldi, o’nlab kishilar yaralandi”, — deyiladi xabarda.

Ta’kidlanishicha, nishonga olingan maktabda ikki mingga yaqin odam yashab kelgan. 

Yaqin Sharqdagi konflikt 7-oktyabr kuni G‘azo sektori Isroil tomon minglab raketalarni otganidan so‘ng keskinlashdi. HAMAS ham chegaradosh aholi punktlariga hujum qilib, tinch aholini garovga oldi.

Isroil mudofaa kuchlari bunga javoban “Temir qilichlar” operatsiyasini boshladi. Oktyabr oyining oxirida operatsiya quruqlik bosqichiga o‘tdi. G’azo shahri Isroilning quruqlikdagi kuchlari tomonidan o‘rab olingan, sektor amalda janubiy va shimoliy qismlarga bo'lingan.