Andijon viloyati Oltinko‘l tumanida 19-noyabr kuni fuqaro Nexia-2 rusumli avtomashinasida yo‘lning qatnov qismida ketayotgan 25 yoshli U.O.ni urib yuborgan. Bu haqda Andijon viloyati IIB YHXB axborot xizmati “Daryo”ga maʼlum qildi.
Aytilishicha, Oltinko‘l tumani hududidan o‘tgan davlat ahamiyatidagi 4R-112 Farg‘ona halqa yo‘li avtomobil yo‘lining 133-km qismida 24 yoshli fuqaro S.M. o‘zining Nexia-2 rusumli transport vositasida harakatlanib ketayotgan vaqtida yo‘lning qatnov qismida 25 yoshli U.O.ni urib, voqea joyidan yashiringan.
Tezkor qidiruv harakatlari natijasida haydovchi qo‘shni Baliqchi tumanidan topilib, ushlangan.
Ushbu YTH oqibatida fuqaro U.O. tan jarohati olib tuman shifoxonasiga yotqizilgan. Ko‘rsatilgan tibbiy yordamga qaramay, u vafot etgan.
Qo‘shimcha qilinishicha, mazkur holat yuzasidan Oltinko‘l tumani IIB tergov bo‘limi tomonidan surishtiruv ishlari olib borilmoqda.
Izoh (0)