Bild harbiy eksperti Yulian Ryopke Rossiya Avdeyevkada yangi taktika qo‘llayotganini ma’lum qildi. U rus qo‘shinlari Avdeyevkani qo‘lga kiritishga urinib, 3000 ga yaqin odamini yo‘qotganini aytdi.
Voqea joyidan olingan kadrlarda rus askarlarining jasadlari bilan qoplangan minalangan maydonlarni ko‘rish mumkin. Shu bilan birga, Rossiya qurolli kuchlari 270 ga yaqin zirhli texnikasini yo‘qotgan. Shuning uchun ular Avdeyevkani “piyoda o‘rab olish” taktikasiga o‘tgan. Ryopke buni “Baxmut taktikasi” deb ham ataydi.
Hujum, asosan, vagnerchilar Baxmutda qilganidek, piyoda qo‘shinlar tomonidan amalga oshiriladi.
Bild eksperti Avdeyevkadagi Ukraina garnizonini 2000-3000 jangchi deb hisoblaydi. Ularda hali ham G‘arb zirhli mashinalari, jumladan, Bredli piyodalarining jangovar mashinalari va Leopard-2 tanklari mavjud. Ryopke Rossiya qurolli kuchlarining katta yo‘qotishlari ularning muvaffaqiyatsizligidan dalolat berishiga ishonmaydi. U buni “sifat o‘rniga miqdor” tamoyiliga asoslangan Moskvaning ataylab uyushtirgan taktikasi deb ataydi va Baxmutda shunday bo‘lganini eslaydi. U yerda Rossiya va Ukraina qurolli kuchlarining yo‘qotishlari 10: 1 nisbatda bo‘lgan, ammo oxir-oqibat rus qo‘shinlari shaharni egallab olgan.
Tahlilchining fikricha, hozir ham xuddi shunday holat yuz bermoqda. Bu ruslarning Stepovoye qishlog‘iga muvaffaqiyatli yurishini va Avdeyevka shimolidagi temir yo‘l liniyasini yengib o‘tishini eslatadi.
Izoh (0)