Isroil G‘azo sektorida harbiy operatsiyaning yangi bosqichi boshlanganini e’lon qildi

Isroil mudofaa vaziri Yoav Gallant 16-noyabr kuni Isroil mudofaa kuchlari bo‘linmalari G‘azo shahrining g‘arbiy dahalari egallanganini ma’lum qildi.

“Isroil mudofaa kuchlari G‘azo shahri g‘arbini egalladi, hududni HAMAS a’zolari va vositalaridan tozaladi”, — deb uning so‘zlarini keltirdi The Times of Israel.

Vazirning ta’kidlashicha, harbiylar hozir quruqlikdagi operatsiyaning yangi bosqichini boshlamoqda.

Gallant, shuningdek, harbiylar G‘azo sektoridagi Al-Shifo shifoxonasini tintuv qilish chog‘ida “muhim narsalarni” topganini aytgan, biroq uning tafsilotlariga to‘xtalmagan.

Bir necha kun oldin Isroil harbiylari G‘azo sektoridagi Al-Shifo kasalxonasida HAMAS jangchilariga qarshi operatsiya boshlaganini ma’lum qilgandi. HAMAS kasalxonada faqat tinch aholi borligini ta’kidlagan, jumladan, reyd tunda o‘tkazilgan paytda shifoxonada 9 mingga yaqin odam – bemorlar, tibbiyot xodimlari va ko‘chirilganlar bo‘lgan.

Isroil armiyasi operatsiya oddiy fuqarolarga “zarar yetkazmaslik uchun” shifokorlar guruhlari va arab tilini biladigan odamlar ishtirokida “maqsadli” amalga oshirilayotgani aytgan.