Bugungi kunda interyer bo‘yicha mutaxassislar uyda sunʼiy gullar saqlamaslikni tavsiya qilishmoqda. Buning asosiy sabablari nimalardan iborat? Sunʼiy gullar xonadon sohiblarining salomatligiga zarar yetkazishi mumkinligi rostmi? Quyida shu savollarga javob beramiz.
Sunʼiy gullarga nisbatan munosabat har kimda turlicha. Kimlardir bu turdagi gullarni past sifati uchun xush ko‘rmaydi, boshqalar esa ular yordamida uyni bezatish oson va qulay degan fikrda. Darhaqiqat, ushbu qarashlar arzirli asosga ega: plastikdan ishlab chiqarilgan gullar alohida parvarishni talab qilmaydi va chidamliligi bilan ajralib turadi. Shunday bo‘lsa ham bu har kimning didiga bog‘liq masala. Uyingizni sunʼiy gullar bilan bezatmoqchisiz, ammo ular haqida to‘liq tasavvurga ega emasmisiz? Bu borada sizga yordam berishga shaymiz. Xo‘sh, uyda sunʼiy gul saqlash nimasi bilan xavfli?
1. Salomatlikka zarar yetkazadi
Bizningcha, bu masalada ortiqcha tushuntirishlarga hojat yo‘q. Arzon materiallardan tayyorlangan plastik gullarning aksariyat qismi Xitoyda ishlab chiqariladi. Odatda ularning asosini polivinilxlorid yoki arzon plastmassa tashkil etadi. Bu esa sunʼiy gullar o‘zida salomatlik uchun zararli moddalarni saqlashidan darak beradi.
Xavfli toksinlar havoga ko‘tarilib, allergiyaning og‘ir shaklini keltirib chiqarishi mumkin. Gullar matodan tayyorlangan bo‘lsa, o‘ziga chang yig‘ib oladi. Gullarni changdan tozalash esa haddan tashqari qiyin bo‘ladi.
Lateks, organza kabi sintetik matolar maʼlum shaklga kirishi uchun ularga kimyoviy aralashmalar bilan ishlov beriladi. Rang uchun esa anilin bo‘yoqlaridan foydalaniladi. Bu turdagi bo‘yoqlar ham salomatlik uchun haddan tashqari xavfli: ular bosh aylanishini keltirib chiqarishi, bosh og‘rig‘i, holsizlikka sabab bo‘lishi mumkin. Gul changlari penoplastdan yasaladi, ushbu material parchalanganda o‘zidan kanserogen modda – stirolni ajratib chiqaradi. Bezak sifatida ishlatiladigan mayda detallar esa bolalar uchun xavfli bo‘lib, ko‘p hollarda kichkintoylar ularni burun teshigiga kiritib ko‘rishadi yoki yutib yuborishadi.
2. Tabiat uchun xavfli
Arzon plastikdan tayyorlangan gullarning tabiatga keltiradigan zarari salomatlikka yetkazadigan ziyonidan kam emas. Ularni ekologik jihatdan xavfsiz deb bo‘lmaydi. Kundalik hayotda plastik supurgilar, savatlar, idishlar, paketlarning faol qo‘llanila boshlangani ekofaollarni tashvishga solgani rost. Yaroqsiz holatga kelgan plastik buyumlar chiqindiga uloqtirilganidan keyin ekologiya uchun haqiqiy muammoga aylanadi. Plastikning parchalanishi uchun 100-500 yil kerak bo‘ladi. Bu esa plastik buyum yuz yillar davomida o‘zidan salomatlik uchun xavfli bo‘lgan og‘ir metallar va dioksinlarni ajratib chiqarishini anglatadi. Uyingizga o‘ziga xos ko‘rinish berishni, shu bilan birga atrof-muhit haqida qayg‘urishni istasangiz, diqqatingizni haqiqiy gullarga qarating.
3. “Arzon” dizayn
Interyer dizaynerlari uyingizni sunʼiy gullar va o‘simliklar bilan bezatmoqchi bo‘lsangiz, tejamkorlik haqida unutishni maslahat berishadi. Hamyonbop narxdagi dekorativ gullar aksariyat holatlarda notabiiy ko‘rinadi, interyer dizaynini “buzib qo‘yadi”. Bundan tashqari, ular o‘zining chiroyli holatini juda tez yo‘qotadi, bo‘yoqlari o‘chib ketadi yoki xira tortadi. Shunda ham sunʼiy gullar xarid qilish fikridan qaytmagan bo‘lsangiz, ularni tanlash vaqtida tejamkorlik haqida unuting.
Sunʼiy gullarni vinil va sifatli sintetik materiallardan tayyorlangan turlarini xarid qiling. Ularni bozordan emas, maxsus firmalardan sotib oling. So‘nggi yillarda bu kabi firmalar interyer uchun gullar tayyorlashni haqiqiy sanʼat turiga aylantirishgan. To‘g‘ri, mahsulotlar narxi haddan tashqari qimmat, biroq sifati qiymatiga arziydi. Shuningdek, gullarni uyingizga joylashtirishda ham muhim qoidani yodda tuting – ularni qorong‘i burchaklarga joylashtirish tavsiya etilmaydi. Aks holda gullarning chiroyini to‘liq ochib bera olmaysiz. Eng muhimi – oshirib yubormang. Uyingizni gullar bilan to‘ldirib tashlash ruhiy holatingizga salbiy taʼsir ko‘rsatishi mumkinligini yodda tuting.
Izoh (0)