Ijtimoiy tarmoqlarda bir erkak boshqa erkakni kutilmaganda zarba berib betonga boshi bilan yiqitgani haqida video tarqaldi. Toshkent viloyati IIBB matbuot kotibi holat yuzasidan ma’lumot berdi.
Aniqlanishicha, videodagi holat 12-noyabr kuni Yuqori Chirchiq tumani Yangibozor hududida joylashgan fastfud savdo shoxobchasida ikki fuqaro gap talashishi natijasida sodir bo‘lgan.
Janjaldan so‘ng ular o‘zaro gaplashib olish maqsadida shoxobcha tashqarisiga chiqqan vaqtda 21 yoshli A.Q. 26 yoshli B.T.ning yuziga musht tushirgan va fuqaro hushini yo‘qotgan. Shundan so‘ng unga birinchi yordam ko‘rsatilib, o‘ziga keltirilgan. IIBga murojaat yoki xabar berilmagan.
Hozirda holat yuzasidan hududiy IIB tomonidan tergovga qadar tekshiruv harakatlari olib borilmoqda. Fuqaroning tan jarohati yuzasidan ekspertiza tayinlangan.
Dastlabki ma’lumotga ko‘ra, 26 yoshli B.T. shu kuni mastlik holatida bo‘lgan va u shoxobcha ichida o‘zi bilan janjallashgan shaxsni va boshqalarni turli so‘zlar bilan haqoratlagan.
Izoh (0)