“Yugur yoki o‘l”: Qirg‘izistonda politsiya ota-onalarni yangi xavfli o‘yindan ogohlantirdi

Qirg‘iziston Yo‘l harakati xavfsizligi davlat departamenti ota-onalarni “Yugur yoki o’l” o‘yinidan ogohlantirdi.

Ota-onalardan farzandlarining mobil telefonlarini tekshirish so‘ralgan. Politsiya “Yugur yoki o‘l” o‘yini yoshlar orasida ommalashayotganidan ogohlantirmoqda.

“Tasdiqlanmagan maʼlumotlarga ko‘ra, Qirg‘iziston hududida bunday o‘yin o‘tkazish holatlari kuzatilmagan, biroq Qozog‘istonning Kostanay viloyatida ham shunga o‘xshash voqea sodir bo‘lgan.

Biz ota-onalarni farzandlarining mobil telefonlarini tekshirish va ular bilan profilaktik suhbatlar o‘tkazishni tavsiya qilamiz. Haydovchilarni ham yo‘llarda hushyor bo‘lishga chaqiramiz”, — deya ta’kidladi Yo‘l harakati xavfsizligi davlat inspeksiyasi matbuot xizmati.

Avvalroq ijtimoiy tarmoqlarda bolalar va o‘smirlar ishtirokidagi xavfli o‘yinlar aks etgan videolar tarqala boshlagandi. O‘yin mohiyati harakatlanuvchi transport vositalari oldida yo‘lni kesib o‘tishga harakat qilishdir.