Portugaliya politsiyasi mamlakat bosh vaziri Antonio Kostaning rasmiy qarorgohini tintuv qilish uchun keldi. U yerda prokuratura organlari bilan hamkorlikda korrupsiya holatlari yuzasidan tergov harakatlari olib borilmoqda. Bu haqda El Mundo xabar qildi.
Tergovchilar o‘z e’tiborini Portugaliya shimolidagi litiyni qidirish ishlari va Sineshdagi yashil vodorod bo‘yicha megaloyihalarga qaratishdi. Bosh vazir administratsiyasi amaldorlari bu loyihalarni amalga oshirishga ruxsat berish uchun bir qator kompaniyalardan turli moddiy manfaat olishda gumonlanmoqda.
Tekshiruv doirasida Kosta ma’muriyati rahbari Vitor Eskariya, bosh vazir maslahatchisi Laserda Machado va Sinesh meri Nuno Maskarenyash so‘roq qilingan.
Shuningdek, bu ishda atrof-muhitni muhofaza qilish vaziri Duarto Kordeyro va infratuzilma vaziri Joao Galamba, shuningdek, sobiq atrof-muhit vaziri Joao Pedro Matos Fernandes gumondor deb topilgan.
Izoh (0)