“Kasalligimni reklama qilishni istamayman”. Shohida Uzoqova og‘ir dardni boshdan kechirgani va o‘g‘li haqida gapirishni istamasligi haqida

Taniqli aktrisa Shohida Uzoqova “Omon-omon” ko‘rsatuviga bergan intervyusida aprel oyida og‘ir kasallikni boshdan kechirgani haqida so‘zlab berdi.

“Men hech qachon kasalligimni reklama qilishni istamayman. Aprel oyida mikro infarktni boshdan kechirdim. Rahmatli Murod Rajabov yotgan shifoxonada davolandim. Murod aka yotgan palatadan ikkita naridagi xonada edim. Murod aka men yotganimdan keyin besh kun o‘tib vafot etdilar. Alloh rahmatiga olgan bo‘lsin. Inson sog‘lig‘i uchun kurashishi kerak. O‘ziga o‘zi men yaxshiman, yaxshi bo‘lib ketaman, deyishi kerak”, — deydi aktrisa.

“O‘g‘lim haqida beriladigan savollarga javob bermayman, deganman har doim. Buning sababi ona uchun farzandining qilgan kichkina ishi ham katta yutuqdek tuyuladi. Ona doim farzandining ignadek qilgan ishidan ham faxrlanadi. Alisher Uzoqov tashqarida aktyor. Uyda balki unga xatolarini aytarman. Men unga boshida aytganman, sen zo‘r emassan, sendan zo‘rlari bor, deganman. O‘g‘lim haqida aytadiganlarim shu. Biz intervyularda bir-birimiz haqida gaplashmaslikka kelishganmiz”, — deydi aktrisa.