AQSH Ukrainaga harbiy yordam paketlari hajmini kamaytirmoqda, chunki Pentagon zahiralarini iloji boricha uzoqroq saqlab qolish kerak. Bu haqda Oq uy matbuot kotibi Karin Jan-Pyer brifingda ma’lum qildi, deb xabar bermoqda Reuters.
“Ukrainaga yordam berish uchun Kongress tomonidan ma’qullangan mablag‘lar deyarli tugadi”, — deb qo‘shimcha qildi Karin Jan-Pyer.
Shu munosabat bilan u Kongressni ta’minot uchun qo‘shimcha mablag‘ ajratish haqidagi so‘rovni tezroq qabul qilishga chaqirdi.
3-noyabr kuni Pentagon AQSH Ukrainaga 125 million dollarlik qurol-yarog‘, jumladan, NASAMS zenit-raketa majmuasi va HIMARS yoppasiga o‘t ochuvchi reaktiv tizimlari uchun snaryadlar yuborishini ma’lum qildi. Bundan tashqari, AQSH Mudofaa vazirligi Ukraina Qurolli kuchlari uchun 300 million dollarlik o‘q-dorilar ishlab chiqarish bo‘yicha shartnomalar imzolaydi.
AQSH prezidenti Jo Bayden Kongressdan Ukraina, Isroil va Tayvanga yordam ko‘rsatish uchun 106 milliard dollar so‘ragandi. Shundan 61,4 milliard dollari Ukrainaga, yana 14,3 milliard dollari Isroilga harbiy yordam uchun ajratilishi rejalashtirilgan edi. Vakillar palatasi qonun loyihasini ikkiga bo‘lish va Isroilni moliyalashtirishni ustuvor vazifa sifatida ko‘rib chiqishni taklif qildi.
Izoh (0)