Rossiyada 30-oktyabrda nishonlanadigan Siyosiy mahbuslar kunida qamoq jazosini o‘tayotgan qator rossiyalik siyosatchilar bir kunlik ochlik e’lon qildi. Bu haqda DW nashri xabar bermoqda.
Ushbu tashabbus oktyabr oyi boshida Korrupsiyaga qarshi kurash fondi asoschisi Aleksey Navalniy tomonidan ilgari surilgandi. Aksiyaga Ilya Yashin, Vladimir Kara-Murza, Liliya Chanisheva, Daniyel Xolodniy va Vadim Ostanin ham qo‘shilib, Navalniy saytida e’lon qilingan murojaat matniga imzo chekdi. Ochlik e’lon qilishda siyosiy faol Mixail Kriger ham ishtirok etgani aytilmqda.
Aleksey Navalniyning chaqirig‘ini qo‘llab-quvvatlagan siyosatchilar ovqatlanishdan bosh tortishga muvaffaq bo‘lgan-bo‘lmagani hozircha noma’lum. Rossiya koloniyalari rahbariyati 30-oktyabr kuni ochlik e’lon qilgan siyosatchilarni to‘xtatishga uringan: sovet davrida bu sanada ovqat yeyishdan bosh tortganlar jazo kamerasiga yuborilar edi.
Ayni paytda, “Memorial” inson huquqlari tashkiloti ma’lumotlariga ko‘ra, Rossiyada siyosiy mahbuslar yoki diniy e’tiqodi tufayli ta’qibga uchraganlar soni 600 kishidan oshgan. “Memorial” hisobotiga ko‘ra, 2014-yil boshidan buyon bu 15 barobarga o‘sdi. Huquq himoyachilari esa, ularning hisob-kitoblaridan yuzlab odamlar chetda qolgan bo‘lishi mumkinligidan ogohlantirdi.
Izoh (0)